Təbrizdə türkcə çəkilmiş "Atabay" filmi təqdim olunacaq

SON XƏBƏRLƏR

Təbrizdə türkcə çəkilmiş "Atabay" filmi təqdim olunacaq

2021.11.23, 10:35

Gunaz.tv

Eyni gündə film Təbrizin “Setarebaran”, “Qüds” və “Laləpark” kinoteatrları iıə yanaşı İranın bir sıra şəhərlərində də ekrana çıxarılacaq.

Film ekran əsərinin ssenari müəllifi olan Hadi Hicazifərin doğulduğu Xoy şəhərinin yaxınlığında çəkilib.

Əsas süjet xətti romantik münasibətlər haqqında olan filmdə H.Hicazifər eyni zamanda baş rolda çəkilib.

Uğursuz sevgi hekayəsi və ailə daxili mənfi hadisələr nəticəsində tək qalan Kazım yeni bir sevgi hekayəsinə qədəm qoyur.

"Atabay" filmi ilk dəfə 38-ci Fəcr Beynəlxalq Kinofestivalında ekranlara çıxıb və 5 müxtəlif nominasiyaya təqdim edilib. Film güneyli rejissor Niki Kəriminin ən yaxşı əsəri kimi tanınır.

"Atabay" filmi İranın ilk kino jurnalı olan və kino tənqidçilərinin jurnalı kimi tanınan aylıq “Film” jurnalı tərəfindən 38-ci Fəcr Kinofestivalının ən yaxşı əsəri kimi seçilib.

Türk dilinin filmdə xüsusi yer alması bundan öncə mətubat konfransında gərgin anlara səbəb olub. Bir jurnalist ölkənin rəsmi dilinin farsca olduğu halda farsca altyazı ilə nümayiş edilən əsərlər nəyə lazımdır deyərək, əsərin türkcə çəkilişinə etiraz edib.

“Kim deyib ki biz bütün filmləri yalnız farsca çəkməliyik? Onsuz da ölkədə filmlərin 90 faizi farsca çəkilir”-deyə, filmin rejissoru Niki Kərimi cavab verib.

Jurnalistə ən kəskin cavabı isə özü də türk olan ssenari müəllifi Hadi Hicazifər verib.

“Mən sizə ssenari müəllifi və bir türk kimi cavab verirəm. Sizin düşüncələriniz faşist düşüncəsidir. Buna təəssüf edirəm”-deyən, ssenari yazarı jurnalisti susdurub.

Kino tənqidçilərinin diqqətini cəlb edən Atabəy filmi mətbuat konfransında baş verən mübahisə ilə də gündəmə gəlib.

Filmdə Azərbaycan türkcəsinin yer alması Güney azərbaycanlılar tərəfindən müsbət qarşılanaraq dəstəklənib.

C.E

هادی حجازی فر راوی شب پنجم «علمدار» شد