Mədəni fəal Məhəmməd Eyni Rəşt zindanından sərbəst buraxılıb

SON XƏBƏRLƏR

Mədəni fəal Məhəmməd Eyni Rəşt zindanından sərbəst buraxılıb

2022.08.16, 05:16

Gunaz.tv

Onun 2 il 7 ay həbs cəzasına məhkum edildiyi, yaxınları ilə məsləhətləşmələrdən sonra ilkin məhkəmənin qrarına etiraz etmədiyi üçün həbsdən buraxıldığı və həbs cəzasının qalan hissəsini elektron qandalla nəzarətdə keçirəcəyi bildirilir.

Məhəmməd Eyninin 8 ay həbsdə saxlanılmasına baxmayaraq onun ittihamları barədə dəqiq məlumat verilmir.

Qeyd edək ki, Rəşt şəhərində yaşayan azərbaycanlı milli-mədəni fəal Məhəmməd Eyni 2022-ci il yanvarın 22-də təhlükəsizlik idarəsinə çağırılıb.

Yanvarın 23-də Rəşt şəhərinin təhlükəsizlik idarəsinə gedən fəal saxlanılıb və uzun müddət ETTELAAT təcridxanasında dindirildikdən sonra mart ayının əvvəllərində Rəşt şəhərinin mərkəzi zindanına köçürülüb.

Sonra onun telefon danışığına, ailəsi ilə görüşünə icazə verilməyib və nədə ittiham olunduğu barədə hər hansı bilgi almaq mümkün olmayıb.

Bundan öncə 2020-ci ilin oktyabr ayında Məhəmməd Eyni İbrahim Gənci və Vədud Əsədi ilə birgə Azərbaycan Ordusunun Qarabağın azadlığı uğrunda apardığı əməliyyatlara dəstək verdiklərinə görə saxlanılmışdı.

Onlar “ölkənin milli təhlükəsizliyinə qarşı fəaliyyət” və “sistemə qarşı təbliğat” ittihamı ilə mühakimə olunmuşdu.

Ancaq 2021-ci ilin noyabr ayında Rəşt şəhərinin İnqilab Məhkəməsinin 12-ci bölməsi tərəfindən barələrində qaldırılan cinayət işinə son verilmişdi.

Cavidan