ABŞ BMT-nin İNSAN HAQLARI ŞURASINDAN ÇIXIR

SON XƏBƏRLƏR

ABŞ BMT-nin İNSAN HAQLARI ŞURASINDAN ÇIXIR

2021.10.20, 07:36

Gunaz.tv

ABŞ BMT-nin İnsan Haqları Şurasından çıxdığını elan edib. Dövlət Departamentindən yayılan məlumata görə, bu şuranın dünyada insan haqlarının pozulması faktlarına münasibəti adekvat deyil və Birləşmiş Ştatları qane etmir. Digər tərəfdən şurada əslində özləri insan haqlarını kobud şəkildə pozan ölkələr təmsil olunur. Bu isə qurumun insan haqları problemlərinə adekvat münasibət göstərməsinə imkan vermir. ABŞ bəyan edib ki, yalnız ən mühüm hadisələrin müzakirəsi zamanı şuranın iclasına qatıla bilər. Qeyd edək ki, BMT-nin İnsan Haqları Şurası iki il əvvəl yarananda çoxlu təzyiqlər altında idi, çünki ondan tələb olunurdu ki, öz sələfi olan İnsan Haqları Komissiyasından daha yaxşı işləsin. Komissiya Zimbabve və İran kimi ölkələrdə insan haqlarının pozulması hallarına göz yummaqda və İsrail əleyhinə çalışmaqda ittiham olunurdu. İndi isə yeni İnsan Haqları Şurası oxşar tənqidlərlə üzləşib. Çünki İnsan Haqları Komissiyasının yerində yaradılan və daha geniş mandata sahib olan Şura da öz fəaliyyətinə görə heç nə ilə fərqlənmir. Onun tərkibində Azərbaycan, Kuba və insan haqları sahəsində acınacaqlı vəziyyətin hökm sürdüyü digər ölkələr təmsil olunub. “Human Rights Watch” təşkilatının nümayəndəsi Cülyetta de Rivero ABŞ-ın qərarına münasibət bildirərkən deyib: “Biz çox məyusuq, çünki biz ABŞ kimi hökumətdən İnsan Haqları Şurasını effektiv foruma çevirmək üçün onun işində aktiv iştirak etməsini gözləyirik. Biz istəyirik ki, ABŞ İnsan Haqları Şurasına arxasını çevirməkdənsə, onun işinə qoşulsun”. Siyasət şöbəsi