“Xarici turistlərin İrana səfərlərinin təxminən 90 faizi ləğv edilib. Həmçinin iranlıların xarici səfərlərinin 50%-dən çoxu azalıb”,- deyə, Rəfii bildirib.
O, bunun təbii və ölkədə hakim olan hazırkı şəraitə uyğun olduğunu deyib.
"Bu olduqca təbii haldır. Bir evdə yanğın çıxanda onun çevrəsi də təhlükəli olur"-Hörmətullah Rəfii deyib.
İranın Hava Səyahətləri və Turizm Xidmətləri İdarəsinin Həmkarlar İttifaqının rəhbəri Avropa ölkələrinin Rusiya turistləri üçün tətbiq etdiyi məhdudiyyətlərə toxunaraq, onların İrana cəlb edilməsi istiqamətində işlər aparılmasını tövsiyə edib.
Bundan öncə, İran Turist Bələdçilərinin Sinfi Assosiasiyaları İdarə Heyətinin sədri Möhsün Hacı Səid etirazlardan sonra Almaniya, İspaniya, Braziliya və Avstraliyanın İrana bütün turizm turlarını tamamilə ləğv etdiyini deyib.
O, İranın "Təsnim" xəbər agentliyinə verdiyi açıqlamada yeni ölkələrin də buna qoşulacağı ehtimalından danışıb və bu sahədə ciddi ziyan olacağı barədə xəbərdarlıq edib.
Möhsün Hacı Səid bu turların ləğvi ilə bağlı dəqiq statistik məlumat verməsə də, bu turların ləğvinin bəzi ölkələrin Xarici İşlər Nazirliyinin İrana səfər etməmək barədə xəbərdarlığından sonra baş verdiyini bildirib.
İranda etirazların başlaması ilə İran hakimiyyəti bir sıra xarici vətəndaşların həbs olunduğunu elan edib, bu etirazların faktor və səbəblərini İran hüdudlarından kənarda göstərməyə çalışıb.
Xarici ölkələr vətəndaşlarının həbs edilərək qondarma ittihamlarla mühakimə olunmasından sonra bir neçə ölkə vətəndaşlarına İrana səfər etməməklə bağlı xəbərdarlıq edib.
Timur
