SON XƏBƏRLƏR

Astaranın millət vəkili nəticə məlum olduqdan sonra keçirdiyi sorğunu təkzib edib!

2021.10.20, 07:36
Astaranın millət vəkili nəticə məlum olduqdan sonra keçirdiyi sorğunu təkzib edib!

Gunaz.tv

GünAz TV: Millət vəklili Vəli Dadaşi vaxtı ilə Ərdəbil bölgəsi və Şərqi Azərbaycan Əyalətində yerləşən Astaranın yenidən Ərdəbilə ilhaq edilməsi ilə bağlı keçirdiyi sorğunun nəticəsi məlum olduqdan sonra özünün keçirdiyi sorğunu təkzib edib.

 

O rəsmi İnstaqram səhifəsində yaydığı məlumatda onun tərəfindən sorğu keçirilmədiyini açıqlayıb.

 

Halbuki, millət vəkili aprelin 3-də rəsmi İnstaqram səhifəsində respondentlərə “Siz Astaranın Ərdəbilə ilhaq edilməsinə razısınızmı?” sualını ünvanlayaraq sorğu keçirib. Nəticəsi çoxlarına öncədən məlum olan sorğuda iştirak edənlərin 68 faizi Astaranın Ərdəbilə birləşdirilməsinin tərəfdarı olduğunu bildirib.

 

Millət vəkili sorğunun ilkin nəticəsini gördükdən sonra onu İnstaqram səhifəsindən silib və aprelin 5-də səhifəsində yaydığı məlumatda özü keçirdiyi sorğu ilə bağlı yayılan xəbərləri təkzib edib.

 

 

Bundan əvvəl Rəşt Bələdiyyə İdarəsinin rəsmisi Muxtar Cabbari bildirmişdir ki, “bir ciddi araşdırma ilə Astara əhalisinin Ərdəbil Əyalətinə birləşmək istəmədiyini göstərmək lazımdır.”

 

İran inzibati ərazi bölgüsü qanununun 10-cu maddəsinə görə, dövlət siyasi-ictimai mülahizələri nəzərə alaraq hər kəndi ən yaxın mərkəzi kəndə, hər mərkəzi kəndi ən yaxın qəsəbəyə, hər qəsəbəni ən yaxın şəhərə və hər şəhəri ən yaxın əyalət mərkəzinin inzibati ərazisinə daxil etməlidir.

 

Astara şəhəri Gilan Əyalətinin mərkəzi olan Rəşt şəhərinin təxminən 200, Ərdəbilin isə 70 kilometrliyində yerləşir. Həm qanuna görə, həm də şəhərin tarixini nəzərə aldıqda bu məntəqə Ərdəbil Əyalətinə birləşdirilməlidir. Üstəlik şəhərin əhalisi də bütün azərbaycanlılar kimi Astaranın yenidən Ərdəbil Əyalətinə ilhaq edilməsinin tərəfdarıdır.

 

Astara məntəqəsi 1958-ci (hicri-şəmsi təqvimi ilə 1337-ci il) ildə Azərbaycanın Xəzər dənizi ilə irtibatını kəsmək məqsədi ilə dövrün Şərqi Azərbaycan Əyalətindən qoparılaraq Gilan Əyalətinə ilhaq edilib. Bu məntəqənin Gilana ilhaq edilməsi, Təbrizdən Astaraya məsafənin uzaq olması, Heyran caddəsinin keyfiyyətsiz olması və bölgədə lazımi infrastrukturun olmaması ilə izah olunub. Hazırda isə Astaranın Gilan Əyalətində qalması üçün heç bir məntiqi dəlil yoxdur.

N.S

SEÇİLMİŞ XƏBƏRLƏR

Çox oxunanlar