GünAz TV: Tehranın Evin zindanında məhbus həyatı yaşayan güney azərbaycanlı araşdırmaçı-alim, mütəxəssis həkim Əhmədrza Calali səhhətində ciddi problem olduğu halda tibbi xidmətdən məhrumdur, onun ölüm təhlükəsi olduğu bildirilir.
Birləşmiş Millətlər Təşkilatının İnsan Hüquqları Komissiyası bəyanat yayaraq İran hökumətindən istəyib ki, təcili müalicəyə ehtiyacı olan məhbuslara tibbi xidmət göstərilsin.
İyulun 10-da yayılan bəyanatda qeyd olunub ki, İnsan Hüquqları Komissiyası bu barədə dəfələrlə İran hökumətinə müraciət edib, lakin verilən vədlərə rəğmən ölüm təhlükəsi ilə üzləşən məhbusların vəziyyətində heç bir dəyişiklik yoxdur.
Hesabatda bildirilib ki, İranda belə faktlara tez-tez rast gəlinir, artıq bu davranış məhbuslara qarşı yanaşma tərzinə çevrilib.
Bəyanatda Prof. Əhmədrza Calalinin də adı çəkilərək müalicəyə təcili ehtiyacı olan məhbuslar, o cümlədən qadın məhbuslar barəsində İran hökumətinə ciddi xəbərdarlıq edilib.
Prof. Əhmədrza Calali İsveç vətəndaşıdır, o İranda “Mossad”a casusluq ittihamı ilə edama məhkum olunub və hazırda Tehranın Evin zindanında həbsdədir. Alim özünə qarşı irəli sürülən ittihamı dəfələrlə rədd edib, ittihamın heç bir əsası olmadığını bildirib. Deyilənlərə görə, o Avropa ölkələrinə qarşı “Sepah”ın casusluq projelərinə qatılmaqla bağlı təklifi rədd etdiyi üçün rejimin qəzəbinə tuş gəlib.
Təbriz şəhərində dünyaya göz açan Əhmədrza Calali İranda tibbi universitetində təhsilini başa vurduqdan sonra bir müddət Təbii Fəlakətlər Mərkəzində çalışıb. O 2009-cu ildə təhsilini davam etdirmək üçün İsveçə gedib. Təbii fəlakətlər üzrə doktorluq dərəcəsini İsveçin Karolinska İnstitutundan alan Əhmədrza Calali həyat yoldaşı və iki övladı ilə birlikdə İsveçdə qalmalı olub, o İtaliya və Belçika kimi ölkələrdə elmi-tədqiqat müəssisələrində də çalışıb.
Əhmədrza Calali 2016-cı il aprelin 24-dən Tehranın Evin zindanında həbsdədir. O Tehran və Şiraz universitetlərinin dəvəti ilə elmi konfransa qatılmaq üçün İrana səfər etdiyi zaman saxlanılıb. Onun bu müddətdə vəkili ilə əlaqəsinə çoxlu məhdudiyyətlər qoyulub. Azərbaycanlı alim həbsdə qaldığı müddətdə ona olan təzyiqlər, hüquqi vəziyyəti və vəkili ilə görüşünə qoyulan məhdudiyyətlərə görə aclıq aksiyası da keçirib.
Azərbaycanlı alimın dosyesi İranda müəyyən məhbuslara qarşı saxta ittihamla quraşdırılan dəhşətli dosyelərdən biridir. Dosyedə ziddiyyətlərin olduğu ilə bağlı çoxlu faktların üzə çıxdığı bildirilir.
N.S
