SON XƏBƏRLƏR

BUŞ İRANA ŞANS VERMƏK İSTƏYİR

2021.10.20, 07:36
BUŞ İRANA ŞANS VERMƏK İSTƏYİR

Gunaz.tv
Mahmud Əhmədinejad isə deyir ki, ABŞ artıq onun ölkəsinə hücum edə bilməz ABŞ prezidenti Corc Buş Sloveniyada keçirilən sammitdə iştirakını başa vurduqdan sonra Almaniyaya səfər edib. Ağ Ev rəhbəri Almaniya kansleri Angela Merkellə görüşdən əvvəl onun iqamətgahının ərazisində yarım saat velosiped sürüb. Merkellə danışıqlardan sonra mətbuat konfransında jurnalistlər qarşısına çıxan Amerika prezidenti deyib ki, görüşdə İran məsələsi də müzakirə olunub. Onun sözlərinə görə, ABŞ əvvəlki kimi İranın nüvə məsələsinin diplomatik yolla həllinə çalışır və buna sadiqdir. Bununla belə, ABŞ prezidenti “bütün variantların masa üzərində olduğunu” bildirib. Buş deyib ki, İran rəhbərliyi beynəlxalq ictimaiyyətin çağırışlarını eşidərək uranı zənginləşdimək proqramını dayandırmalıdır. “Əgər İran bunu etsə təcriddən yaxa qurtaracaq. Biz İrana şans vermək istəyirik, lakin İran da bilməlidir ki, əgər uranı zənginləşdirmək proqramını dayandırmasa onu Avropadan təcrid gözləyir”. Buş deyib ki, Merkellə danışıqlar zamanı İrana qarşı əlavə sanksiyaların tətbiqi müzakirə edilib. Almaniya kansleri isə öz növbəsində deyib ki, onun ölkəsi İran məsələsinin istisnasız olaraq diplomatik yolla həllinə tərəfdardır. Onun fikrincə, Avropa Birliyi və BMT birgə hərəkət etsə bu məsələdə uğur qazanmaq olar: “İrana qarşı sanksiyalara nə qədər çox ölkə qoşulsa o qədər yaxşıdır, biz Rusiya və Çini də bu sırada görmək istəyirik”. Xatırladaq ki, ABŞ və Avropa liderləri İranın dövlət banklarını beynəlxalq maliyyə sistemindən təcrid etmək üçün yeni tədbirlər planı üzərində işləyirlər. Bu məsələdə ilkin razılaşma var. Buş Almaniyadan sonra İtaliyaya səfər edib və həmin məsələni bu ölkənin rəhbərliyi ilə müzakirə edib. Onun daha sonra Böyük Britaniya və Fransada da olacağı gözlənilir. İran prezidenti Mahmud Əhmədienjad isə bəyan edib ki, Corc Buşun onun ölkəsinə qarşı hərbi əməliyyatlara başlayacağına inanmır: “Buş artıq İrana qarşı müharibə edə bilməz. Çünki ABŞ-ın buna gücü və imkanı yoxdur, Buşun səlahiyyətlərinin bitməsinə də çox qalmayıb”. F.MƏMMƏDOV

SEÇİLMİŞ XƏBƏRLƏR

Çox oxunanlar