Ned Praysın açıqlaması, İran xarici işlər naziri Hüseyn Əmir Abdullahiyanın həmin gün nüvə razılaşmasını canlandırmaq məqsədi ilə Vyanada keçirilən görüşlərdə ölkəsinin Amerika ilə üz-üzə və birbaşa danışıqlar aparılmasının mümkün olması ilə bağlı yaydığı bəyanatından bir neçə saat sonraya təsadüf edib.
Prays deyib ki, Amerikanın Vyanadakı nümayəndə heyəti İran nümayəndələri ilə istər nüvə məsələsində, istərsə də digər mövzular barədə birbaşa danışıqlar aparılmasını müsbət qarşılayır.
“Biz Vyanada İranla birbaşa danışıqlar aparmağa hazırıq. Biz həmişə ölkələrimizin istər nüvə, istərsə də digər məsələlər barədə birbaşa və üz-üzə danışıqlar aparmasının konstruktiv olacağını bildirmiş, bu mövqeyimizə israr etmişik”, -deyə ABŞ Dövlət Departamentinin sözçüsü Ned Prays bildirib.
Prays Vaşinqtonla Tehran arasında birbaşa danışıqlar aparmaq üçün hər hansı bir şərt irəli sürməyib.
Xatırladaq ki, İranın xarici işlər naziri Hüseyn Əmir Abdullahiyan yanvarın 24-də mediaya açıqlamasında nüvə razılaşmasını canlandırmaq üçün Vyanada aparılan müzakirələrdə ilk dəfə olaraq, İranla Amerika nümayəndələri arasında birbaşa və üz-üzə danışıqların aparılmasının mümkünlüyündən danışıb.
O deyib ki, əgər yaxşı bir razılaşmanın əldə olunması üçün ehtiyac duyularsa, İran Amerika tərəfi ilə birbaşa danışıqlar aparmaq məsələsini yenidən nəzərdən keçirəcək.
“Bizim Vyana danışıqlarımız hazırda elə bir nöqtəyə çatır ki, bizim bir sıra texniki mövzularla bağlı müzakirələrimiz yaxın vaxtlarda yekun mərhələsinə çatacaq və biz siyasi qərarımızı verməliyik.
Hesab edirəm ki, əgər yaxşı və yüksək zəmanətli bir razılaşmaya çatmaq üçün ehtiyac və zərurət yaranarsa biz Amerika nümayəndələri ilə birbaşa danışıqlar apara bilərik”, -deyə İranın xarici işlər naziri Hüseyn Əmir Abdullahiyan bəyan edib.
A.M
