İyulun 20-də Belçika parlamentində səsə qoyulan qanun layihəsi 79 lehinə, 41 əleyhinə və 11 tərəfsiz səslə qəbul olunub.
Keçən həftə 13 ölkədən Avropa Parlamentinin 17 üzvü Belçika parlamentinə məktub yazaraq İran və Belçika arasında məhbusların ekstradisiyası ilə bağlı razılaşmanın nəticələrindən ciddi narahat olduqlarını bildirib.
Onlar bu razılaşmanın Belçikanı iranlı terrorçuların təhlükəsiz sığınacağına çevirəcəyi barədə xəbərdarlıq ediblər.
İranın 11 insan haqları təşkilatı birgə bəyanat yayaraq Belçika parlamentinin nümayəndələrindən İranla məhbus mübadiləsi sazişinə qarşı çıxmalarını istəmişdilər.
İnsan haqları təşkilatları qanun layihəsinin təsdiq edilməsinin Belçika məhkəməsində terror fəaliyyətinə görə 20 il həbs cəzasına məhkum edilmiş iranlı diplomat Əsədullah Əsədinin ekstradisiyasına gətirib çıxara biləcəyindən narahatdırlar.
Qeyd edək ki, İranın casus-diplomatı Əsədullah Əsədi üç nəfərlə birlikdə 2018-ci ildə Parisdə İran Xalq Mücahidləri Təşkilatının mitinqini bombalamağa cəhddə ittiham olunur.
Əsədullah Əsədi İranın Avstriyadakı səfirliyində işləyərkən Nəsimə Nəami və Əmir Səduniyə mücahidlərin toplantısını hədəfə almaq üçün başqa bir şəxsin köməyi ilə yarım kiloqram partlayıcı verib.
Belçikada birinci instansiya məhkəməsi 2020-cı ilin fevralında Əsədulla Əsədini 20 il həbsə məhkum edib.
Əsədulla Əsədi apellyasiya şikayətindən imtina edib.
Lakin apellyasiya məhkəməsi Mehrdad Arifani, Nəsimə Nəami və Əmir Səduninin şikayəti əsasında keçirilib.
Əsədullah Əsədi İran Kəşfiyyat İdarəsinin Avropadakı əsas rəsmilərindən biri kimi qeyd edilib və onun bu qitədə İslam Respublikasının casus şəbəkəsinə rəhbərlik etdiyi bildirilir.
Cavidan
