GünAz TV: Binab və Marağa şəhərlərindən əldə edilən məlumata görə, güney azərbaycanlı milli-mədəni fəal və “Milli düşüncə” Teleqram kanalının müdiri Səid Minayi müəyyən şəxslərin vasitəsi ilə məhkəmənin təqib və təzyiqlərinə məruz qalır.
Məlumata görə, kanalında “Marağada paniranistin erməni lobbisi ilə birləşməsi” məqaləsini yayan Binab sakini Səid Minayi təhlükəsizlik qüvvələri tərəfindən saxlanılıb və təhdidə məruz qalıb. “Araz Marağalı” adı ilə yayılan məqalə bir çox teleqram kanalında dərc olunub. Lakin “Araz Marağalı”nın taxma ad olduğu bildirilir. Məqalədə Əsğər Məhəmmədzadənin qələmə aldığı “Darül mülk-i Marağa” kitabı tənqid olunub.
Məlumata görə, Səid Minayi məqaləni Teleqram kanallarından götürüb öz kanalında yaydıqdan sonra Əsğər Məhəmmədzadə ona zəng edərək irad bildirib. Səid Minayi isə məqaləni dərc etdikdən 12 saat sonra onu “Milli düşüncə” kanalından silib. Bundan sonra Əsğər Məhəmmədzadə, Səid Minayi ilə əlaqə saxlayaraq ona öz təöşəkkürünü bildirib.
Məsələ bununla yekunlaşmayıb. Bir müddət sonra Əsğır Məhəmmədzadə gözlənilməz qərar verib və Səid Minayidən şikayət edib. Kitabın müəllifi bununla guya əsərini tənqid edən məqalənin əsl müəllifini tapmaq istəyib.
Azərbaycanlı fəal Səid Minayi edilən şikayət üzrə saxlanılıb. O Marağa məhkəməsinin 2-ci şöbəsində mühakimə edildikdən sonra mülki vəsiqə qarşılığında sərbəst buraxılıb.
Gürcüstanda tarix üzrə təhsil alan Əsğər Məhəmmədzadənin paniranist qüvvələr və Ermənistanın Tehrandakı səfirliyi ilə yaxın əlaqədə olduğu üzə çıxıb. O yazdığı kitabda Marağanın keçmişdə erməni şəhəri olduğunu iddia edib. Gülünc dəlillər gətirən müəllif qeyd edib ki, guya ermənilər mühacir türklərin təzyiqi ilə Marağanı tərk etməyə məcbur olub. Nəfis şəkildə çap olunub və ucuz qiymətə satışa çıxarılan kitabın arxasında hansı qüvvələrin olduğunu anlamaq çətin məsələ deyil. Lakin buna cavab olaraq yazılan məqaləyə görə azərbaycanlı fəalın təqib olunması əlavə şübhələr doğurur. Baxmayaraq ki, Əsğər Məhəmmədzadənin paniranist qüvvələr və Ermənistan səfirliyi ilə əlaqədə olması bir çox suala aydınlıq gətirir.
Əsğər Məhəmmədzadə və məhkəmə tərəfindən Səid Minayiyə edilən təzyiq Azərbaycanın qələm əhli və mədəni fəallarının narahatlığına səbəb olub. Fəallar bunu Azərbaycan Milli Hərəkatına edilən təzyiqlərin tərkib hissəsi kimi qəbul edir.
Səid Minayi mətbuat və mədəniyyət sahəsində fəaliyyət göstərən güney azərbaycanlı milli-mədəni fəallardan biridir, o bundan əvvəl mədəni fəaliyyəti ilə əlaqədar saxlanılıb və təzyiqlərə məruz qalıb.
N.S
