GünAz TV: İran ordusunun baş komandanının koordinasiya məsələləri üzrə müavini Həbibullah Səyyari Amerika Birləşmiş Ştatlarına məxsus təyyarə daşıyan gəminin körfəzə daxil olmasına münasibət bildirib.
O, bunun təbii bir hal olduğunu, hər bir ölkənin gəmilərinin beynəlxalq sularda üzmə hüququnun olduğunu deyib.
Həbibullah Səyyari Amerikaya məxsus gəminin İran sularına daxil olmasına isə icazə verməyəcəklərini deyib. O, Amerikanın bu cür addım “atmaqdan çəkindiyini” iddia edib.
Qeyd edək ki, bir neçə gün öncə Amerikaya məxsus “USS Jon Stennis” adlı təyyarə daşıyan gəmi və onu müşaiyət edən eskadra körfəzə daxil olmuşdu. Eyni vaxtda körfəzdə hərbi təlim keçirən “Sepah” isə prosesi yalnız seyr etməklə kifayətlənmişdi.
İran tez-tez Amerikanın körfəzdə bu ölkəyə məxsus olan sulara daxil ola bilməyəcəyini desə də, tarixi faktlar rəsmi Tehranın bəyanatlarının tam əksini göstərir. 18 aprel 1988-ci ildə körfəzdə Amerika ilə İran arasında yaşanmış toqquşmalar nəticəsində İranın ən güclü hesab etdiyi “Səhənd” kimi gəmilər sıradan çıxmış və 56 iranlı hərbçi həlak olmuşdu. Bu toqquşmalar Amerika Hərbi Dəniz Qüvvələrinin qələbəsi, İranın geri çəkilməsi ilə nəticələnmişdi.
Ə.A
