GünAz TV: Pakistanın baş naziri İmran Xan İranla Ərəbistan arasında yaranmış gərginliklərin azaldılması istiqamətində vasitəçilik missiyası həyata keçirmək üçün sabah Tehrana rəsmi səfər edəcək.
Tehrana böyük siyasi heyətlə səfər edəcək İmran Xanın oktyabrın 13-də Həsən Ruhani ilə görüşəcəyi planlaşdırılır.
Pakistanın baş naziri Tehrandan sonra Səudiyyə Ərəbistanı rəsmiləri ilə görüşmək üçün Ər-Riyada yola düşəcək.
Xəbəri Pakistan Xarici İşlər Nazirliyinin sözçüsü Məhəmməd Feysal jurnalistlərlə keçirdiyi həftəlik mətbuat konfransında təsdiqləyib.
Qeyd etmək lazımdır ki, son illər ərzində regional məsələlər uğrunda başlamış münaqişələr rəsmi Tehranla Ər-Riyad arasındakı ziddiyyətləri daha da gərginləşdirib. İki ölkə uzun müddət regionun bir neçə ölkəsində təmsilçi müharibələr aparsalar da, İranın Səudiyyənin neft təsisatlarına raket və pilotsuz uçan aparatlarla həyata keçirdiyi hücum birbaşa hərbi qarşıdurma riskini artırıb.
Ə.A
