GünAz TV: İranın Əmək Nazirliyi ölkə gənclərinin 30%-nin nə işlədiyi, nə də təhsil aldığı barədə məlumat yayıb.
Nazirliyin Statistika və Strateji Məlumatlar Mərkəzinin hazırladığı hesabata əsasən, bu kateqoriyaya ölkənin 15-24 yaşlı gəncləri daxildir.
Dəyərləndirməyə əsasən, ağır ailə-məişət şəraitinə rəğmən, ailədə yaşlılar və ya uşaqlara baxmaq məcburiyyətinə görə, işləyə bilməyən, xəstə gənclər, eləcə də ciddi maliyyə problemi olmayan, lakin iş axtaran gənclər qeyd edilən kateqoriyaya daxildirlər. Onlar işləməməklə barəbər, təhsil də almırlar.
İşsizlik İran əhalisi, xüsusən də gənclər arasında ən böyük problemlərdən biridir. Ötən il yayılan statistikalarda Kirmanşah əyaləti 16.4% göstərici ilə işsizliyin ən yüksək olduğu bölgə kimi göstərilmişdi. Kohgiluyə və Boyer-Əhməd, eləcə də Sistan və Bəlucistan əyalətləri müvafiq olaraq 4.9 və 4.7%-lik göstərici ilə işsizliyin ən çox artdığı bölgələr olmuşdular.
Digər tərəfdən, aparılmış araşdırmalar göstərir ki, İranın işsiz əhalisinin ümumi sayı 237 min nəfər artaraq, 3 milyon 326 min nəfərə çatıb.
Lakin mütəxəssislər İranın təqdim etdiyi rəsmi statistikaları düzgün hesab etmirlər. Onlar bildirirlər ki, dövlət daxili narazılığa səbəb olmamaq üçün bütün sahələrdə rəqəmləri olduğundan dəfələrlə az göstərməyə çalışır.
Ə.A
