SON XƏBƏRLƏR

İran Məhkəmə Sisteminin rəhbərinin müşaviri koronavirusdan ölüb

2021.10.20, 07:36
İran Məhkəmə Sisteminin rəhbərinin müşaviri koronavirusdan ölüb

Gunaz.tv

GünAz TV: İran Məhkəmə Sisteminin rəhbərinin müşaviri Əhməd Tuyserkani koronavirusdan ölüb.

 

Bu barədə məlumat yayan İran Parlamentinin spiker müavini Əbdülrza Misri 23 millət vəkilinin də koronavirusa yoluxduğunu deyib. Lakin o, həmin deputatların adını çəkməyib.

 

Bundan bir neçə gün öncə yalnız 5 deputatın koronavirus testinin müsbət çıxdığı elan edilmişdi.

 

Əbdülrza Misri iddia edib ki, deputatlar "xalqla sıx təmasda" olurlar və buna görə də, onların yoluxucu xəstəliklərə tutulması təbiidir. O, həmçinin qeyd edib ki, millət vəkillərinin sözügedən virus səbəbindən xalqla görüşləri ləğv edildiyindən, onlar və yeni deputat seçilənlər insanlarla təmasdan çəkinməlidirlər.

 

İranın "İsna" kimi xəbər agentlikləri də Məhkəmə Sisteminin rəhbərinin müşaviri və Daşınmaz Əmlakın Kadastrı və Ünvan Reyestri Xidmətinin sabiq rəhbəri Əhməd Tuyserkaninin sözügedən virus səbəbindən öldüyünü təsdiqləyiblər. Məlumatlarda ürək xəstəliyindən əziyyət çəkən Əhməd Tuyserkaninin koronavirusa yoluxmazdan öncə müalicə almaq üçün xəstəxanaya yerləşdirildiyi deyilir.

 

Digər tərəfdən, İran Təcili Tibbi Yardım Xidmətinin rəhbəri Pirhüseyn Kulivəndin də koronavirusa yoluxduğu barədə yerli media orqanlarında xəbərlər yayılıb. Xidmət yaydığı bəyanatda faktı təsdiqləyib və Kulivəndin hazırda müalicə olunduğunu bildirib.

 

Ötən gün isə "İlna" xəbər agentliyi İranın Tibb Şurasının rəhbərinin müavini Məhəmməd Cahangirinin qeyd edilən virusa yoluxduğu barədə məlumat yaymışdı.

 

Qeyd etmək lazımdır ki, son günlər İranın tanınmış siyasətçiləri və din xadimlərindən bir neçəsinin koronavirusa yoluxduğu və ya bu xəstəlikdən öldüyü barədə xəbərlər yayılmaqdadır.

 

Ə.A

 

 

SEÇİLMİŞ XƏBƏRLƏR

Çox oxunanlar