GünAz TV: İranda son 6 ildə xarici valyutanın dəyərinin artması və onun nəticəsində ixracatda iflyasiya həddinin yüksəlməsinə görə, ət məhsullarının qiymətində kəskin bahalaşma müşahidə olunub və bu da öz növbəsində orta təminatlı ailələrin alıcılıq qabiliyyətinin azalmasına səbəb olub.
Xüsusilə də ötən 1397-ci il (2018-mart- 2019-mart-red.) ərzində ət məhsullarının qiymətlərində rekord həddə bahalaşma satış müəssisələrində təklif edilən məhsulların qıtlığı ilə müşayiət olunub.
Qıtlığa yol açan əsas amillərdən biri ölkəyə xarici valyuta axınını təmin etmək üçün xaricə ixrac edilən ət məhsullarının həcminin artırılması olmuşdu. Dövlət ətin xaricə satılmasına qadağa qoymaqla, ixracatda yaranmış inflyasiyanı nəzarət altında alsa da, lakin heyvanların diri formada ölkə hüdudlarından kənara qaçaq yollarla çıxarılması İranda ət qıtlığını daha da dərinləşdirməkdədir.
Cari ilin yaz fəsli ərzində ətin qiyməti 867.318 ilə 877.727 riyal arasında dəyişib. 3 ay ərzində qiymətdə elə də böyük olmayan, yəni 1000 riyallıq artım olsa da, ötən illərlə müqayisədə cari ildə İranda ətin qiymətinin 100%-dən çox bahalaşdığını görmək mümkündür.
Ölkədə qoyun və mal ətinin 1 kiloqramının qiyməti 1397-ci il (2018-mart- 2019-mart-red.) 1396-cı ilə (2017-mart- 2018-mart-red.) nisbətdə ən azı 120% bahalaşıb.
İran Meyvə və Tərəvəz Satıcıları Təşkilatının iyun ayının sonlarında yaydığı statistikaya əsasən, satış nöqtələrində çəkilmiş qarışıq ətin hər bir kiloqramı 68 min, doğranmış mal əti 92400 və doğranmış qoyun əti 112600 tümənə təklif edilir.
Statistikada həmçinin dana ətinin baldır hissəsinin 1 kiloqramı 92 min tümən, bel hissəsinin isə 89 min tümən olduğu bildirilirdi. Qoyun ətində bu hissələrin qiyməti müvafiq olaraq 111800 və 96 min tümən göstərilirdi. Eləcə də, statistikada heyvanın bədəninin müxtəlif hissələrinin ətlərində kəskin qiymət fərqinin olduğu müşahidə olunurdu.
Ə.A
