GünAz TV: İranın Ali Əmək Şurasının Əməkhaqqı Komitəsinin üzvləri həftələrlə sürən müzakirələrdən sonra keçirilmiş son iclasında fəhlə ailələrinin aylıq xərcləri barədə razılıq əldə ediblər.
Komitə üzvlərinin fikrinə görə, fəhlə kateqoriyasından olan vətəndaşların ailələrinin aylıq xərci 4 milyon 940 min tümən civarındadır.
Komitə ötən il bu rəqəmi 3 milyon 760 min tümən təyin etmişdi. İnişil isə bu rəqəm 1 milyon 300 min tümən təşkil edirdi. Bununla da, Komitə 1 il ərzində fəhlə ailələrinin aylıq xərcinin 32% artdığına qərar verib.
Digər tərəfdən, bu yaxınlarda İran Statistika Mərkəzi ötən 12 ay ərzində qeydə alının inflyasiya həddinin keçən ilin analoji dövrü ilə müqayisədə 37% artdığını bəyan edib. Lakin Ali Əmək Şurasının Əməkhaqqı Komitəsinin fəhlələrin xərclərinin artmasını qiymət və xidmətlərin qiymətlərinin bahalaşmasından aşağı göstərib. Bu isə qeyri-real hesab edilir.
Ötən il fəhlələrin muzdunun məbləğində 36.5% artım müşahidə olunmuşdu. Artıq sözügedən Komitənin fəhlələrin aylıq xərclərinin qiymətini təyin etməsini nəzərə alsaq, üzümüzə gələn 3 həftə ərzində Komitə 1399-cu il üçün (21 mart 2020- 21 mart 2021-red.) muzdun məbləğini müəyyənləşdirmək istiqamətində müzakirələrə başlayacaq.
İranda fəhlələr yalnız əməkhaqlarının az olmasında deyil, eləcə də işsizlikdən əziyyət çəkirlər. Ölkədə hökm sürən iqtisadi böhran səbəbindən ötən illər ərzində saysız-hesabsız müəssisə bağlanıb və on minlərlə fəhlə işsiz qalıb.
Beynəlxalq Valyuta Fondunun statistikasına əsasən, İranda 1396-cı (mart 2017- mart 2018) ildə 14.5 faiz olan işsizlik həddi 1398-ci ildə (mart 2019- mart 2020) 17.4%-ə çatacaq. Bu isə Cənubi Afrika və Sudandan sonra dünya ölkələri arasında ən yüksək göstəricidir.
Ə.A
