İranda kütləvi etirazlarda tutulan gənc aksiyaçının meyiti ailəsinə təhvil verilib

GünAzTV: 12 gün əvvəl İranın Sənəndəc şəhərində hakimiyyətə qarşı keçirilən kütləvi xalq etirazlarında tutulan 24 yaşlı aksiyaçı Saro Qəhrəmaninin meyiti ailəsinə təhvil verilib.

Saro Qəhrəmani, yanvarın 2-də təhlükəsizlik qüvvələri tərəfindən tutulub naməlum istiqamətə aparılsa da, onun harada saxlanılmasının bəlli olmaması, valideynlərinin ciddi narahatlığına səbəb olmuşdu. İranda hakimiyyətə qarşı keçirilən son etirazlarda həbs edilənlərin vəziyyəti və taleyi ilə məşğul olan hüquq-müdafiəçilərinin yaydığı xəbərə əsasən, gənc aksiyaçının meyiti yanvarın 13-də Sənəndəcin ETTELAAT idarəsinin əməkdaşları tərəfindən valideynlərinə verilib. Meyit üzərində zorakılıq və işgəncə əlamətlərinin aşkar edildiyi bildirilir.

Qeyd olunur ki, ETTELAAT əməkdaşları gənc aksiyaçının meyitini valideynlərinə təhvil verdikdən sonra həmən, cənazəni dəfn olunması üçün ata-anası ilə birlikdə eyni maşında Sənəndəc şəhərinin “Behişt-i Məhəmmədiyyə” qəbiristanlığına yola salıblar. İşgəncələr altında öldürülən gənc aksiyaçının dəfn mərasimində yalnız ata-anası iştirak edib və onun digər ailə üzvlərinin qəbiristanlığa gəlməsinə imkan verilməyib.

Yerli rəsmilər, gənc aksiyaçının ölümünün səbəbi barədə hər hansı bir açıqlama verməkdən boyun qaçırıblar.

Xatırladaq ki, son iki həftədə, İranın 100-dən çox şəhərində hakimiyyətə və onun dini lideri axund Əli Xamneyiyə qarşı kütləvi etirazlar keçirilib. Hakim çürümüş rejimin iflasa uğramış iqtisadi, daxili və xarici müdaxiləçi siyasətinə, yoxsulluğa və repressiyalara qarşı keçirilən etirazlarda, Xamneyiyə, prezident Həsən Ruhaniyə və digər rəsmilərə “Ölüm” şüarları səsləndirilib, onların hakimiyyətdən getməsi tələb olunub. Etirazlarda, ən azı 25 nəfər öldürülüb, onlarla aksiyaçı yaralanıb, 3700 nəfərdən çox insan həbs edilib. Tutulanlardan isə ən azı 5-i  zindanda dindirilərkən işgəncələr altında öldürülüb. Hakimiyyət rəsmiləri həmin şəxslərin zindanda “intihar” etdiyini iddia edirlər.

“Bahalığa yox” şüarı adı altında “Teleqram” sosial şəbəkəsində edilən çağırışa əsasən, dekabrın 28-də Məşhəd şəhərindən başlanan etirazlar, az sonra radikallaşaraq molla rejiminin əleyhinə yönəlib. Hazırda ölkənin iri şəhərlərində elan olunmamış fövqəladə vəziyyət hökm sürdüyünə görə, etirazlar müvəqqəti olaraq dayandırılıb.

A.M