İranda məcburi hicaba qarşı etiraz əlaməti olaraq baş örtüyünü açan Şapərək Şəcərizadə 20 il həbsə məhkum edilib

SON XƏBƏRLƏR

İranda məcburi hicaba qarşı etiraz əlaməti olaraq baş örtüyünü açan Şapərək Şəcərizadə 20 il həbsə məhkum edilib

2021.10.20, 07:36

Gunaz.tv

GünAzTV: İranda məcburi hicaba qarşı etiraz əlaməti olaraq bu il, fevralın 21-də Tehranın Qeytəriyyə məntəqəsində baş örtüyünü açdığına görə həbs edilən və dörd gün saxlandıqdan sonra mülki vəsiqə girovu qarşılığında müvəqqəti olaraq azadlığa buraxılan Şapərək Şəcərizadə 20 il həbsə məhkum edilib. Həbsin 18 ili şərtidir.

Tehran inqilab məhkəməsi bir uşaq anası olan Şapərək Şəcərizadəni küçədə baş örtüyünü açmaqda və ictimai asayişi pozmaqda günahlandırıb. Şapərək Şəcərizadə isə yaydığı bir video-çarxda barəsində çıxarılan ağır həbs cəzasından şoka düşdüyünü və dərin təəssüf hissi keçirdiyini bəyan edib.

Xatırladaq ki, İranda qadınların molla rejiminin məcburi hicab siyasətinə qarşı dinc etirazına bu ilin əvvəllərində (1396-cı il, deyin 6-da) start verilib. Bir uşaq anası olan Vida Müvəhhid adlı 31 yaşlı bir qadın, Tehranın İnqilab küçəsində baş örtüyünü açaraq hakimiyyətin qadınlara zorla qəbul etdirdiyi hicaba etirazını bildirib. O, göstərdiyi bu şücaətinə görə sosial şəbəkələrdə “İnqilab küçəsinin qızı” adı ilə məşhurlaşıb.

Vida Müvəhhid

Bunun ardınca, son aylar İranın müxtəlif şəhərlərində onlarla qadın “Məcburi hicaba yox” kampaniyasına qatılaraq, küçədə baş örüklərini açaraq hakimiyyətin bu barədə apardığı siyasətinə dinc etirazlarını bildirirlər. Nəticədə, təkcə Tehranın küçə və meydanlarında baş örtüyünü açan 29 qadın həbs edilib.

Qeyd edək ki, İran İslam Respublikasında ictimai yerlərdə baş örtüyünü açan qadınlara cinayət işi açılır. Belə qadınlar, həbs zamanı polis zorakılığına məruz qalır, həbsxanada müxtəlif təhqir, təzyiq və təhdidlərlə üzləşir, həbsə və pul cəriməsinə məhkum edilirlər.

VİDEO:

A.M