GünAz TV: İranda koronavirusun yayılması səbəbindən tətbiq edilmiş ictimai izolyasi dövründə günlərini evdə keçirən cütlüklər arasında ailə münaqişələri 3 dəfə artıb.
Bu barədə məlumat yayan İranın Rifah Təşkilatının psixoloji müşavirə şöbəsinin rəhbəri Behzad Vəhidniya bildirib ki, bu rəqəmləri onlara daxil olan zənglər əsasında müəyyənləşdiriblər. O, əslində virusun qarşısının alınması istiqamətində tətbiq edilmiş karantin dövründə yaşanan ailə münaqişələrinin bundan dəfələrlə çox olduğunu deyib.
Behzad Vəhidniya qeyd edib ki, ailə münaqişələrinin artmasına səbəb cütlüklərin bütün günü bir yerdə olmaları və gün ərzində birlikdə keçirdikləri müddətin artmasıdır.
Gün ərzində rəhbərlik etdiyi şöbəyə bütün bölgələr üzrə təqribən 4 mindən çox zəngin daxil olduğunu deyən rəsmi ixtilafların bəzilərinin hansı səbəbdən baş verməsini açıqlayıb.
Onun sözlərinə görə, ən çox münaqişə gigiyena qaydalarına riayət etmək və ailə üzvlərindən birinin çölə çıxması üstündə yaşanır. Məktəblərin bağlanmasına görə evdə qalan uşaqların davranışları da cütlüklər arasında münaqişələrə səbəb olan digər amildir.
Qeyd etmək lazımdır ki, dünyanın müxtəlif ölkələrində koronavirusun yayılması səbəbindən insanların ev şəraitində özlərini karantinə alması bir neçə ölkədə də ailə münaqişələrinin sayını artırıb. Tibb mütəxəssisləri bu cür çətin günlər ərzində insanları birgə ailəvi fəaliyyətlərə vaxt ayırmaq, eləcə də fərdi davranış qaydalarına nəzarət etməklə, öz psixoloji vəziyyətlərini stabil saxlamağa çağırırlar.
Ə.A
