GünAz TV: İranın Bocnurd şəhərinin yaxınlığında yerləşən Bidək kəndində 9 yaşlı qızlar ailə qurmağa vadar edilir.
“İran Qəzeti”nin həmin kəndin sakini olan, lakin erkən yaşlarda ailə qurmaqdan yayınıb, təhsil alan qadınla apardığı müsahibədə maraqlı məlumatlar ortaya çıxıb. O bildirib ki, əvvəllər bu kənddə qızlar 11 yaşında ərə verilirdi, indi isə 8 ya da 9 yaşlarında. Qadının dediklərinə görə, hətta onun qohumu olan 13 yaşlı 1 qızın artıq iki övladı var.
Qəzetin məlumatına əsasən, digər bölgələrdə də vəziyyət ürəkaçan deyil. Belə ki, ötən il Şimali Xorasan vilayətində hamilə qadınların 4%-ni 18 yaşdan aşağı qızlar təşkil edib.
Məlumatda həmçinin qeyd edilir ki, Bidək kəndi və bir çox digər bölgələrdə 9 yaşlı qızlar siğə (müvəqqəti nikah-red.) edilir, 12 yaşları tamam olan kimi isə həyat yoldaşlarının evlərinə gedirlər. Hətta 15 yaşı olan qızlar “evdə qalmış” sayıldığından, ya 1 kişinin 2-ci həyat yoldaşı olmalı, ya da xanımı ölmüş 40-50 yaşlı kişi ilə ailə qurmalıdırlar.
Qeyd etmək lazımdır ki, İranın bir çox bölgələrində azyaşlı qızların ailə qurması hallarına tez-tez rast gəlinir. Ötən aylar ərzində bu sahədə yayılmış statistika hər il ölkədə minlərlə azyaşlı qızın ailəsinin təzyiqi ilə ailə qurduğu qeyd edilirdi.
Ə.A
