İranın Əlbürz əyalətində spirtdən ölənlərin sayı 31 nəfərə çatıb

SON XƏBƏRLƏR

İranın Əlbürz əyalətində spirtdən ölənlərin sayı 31 nəfərə çatıb

2021.10.20, 07:36

Gunaz.tv

GünazTV: İranın Əlbürz əyalətində saxta spirtdən zəhərlənənlərin sayı 147-ə, ölənlərin sayı isə 31 nəfərə çatıb.

Bu barədə, Əlbürz əyalətinin Təcili Tibbi Yardım Mərkəzinin rəisi Mehrdad Babayi martın 26-da mediaya açıqlamasında xəbər verib.

Babayi bildirib ki, ötən ay yarım ərzində koronavirusun ölkədə geniş yayılmasının ardınca bəzi aldanmış və məlumatsız insanların şayiələrə uyaraq, özlərini “Covid-19” infeksiyasından qorumaq üçün spirtli içkilərə üz tutmasının sayı artıb: “Təəssüflər olsun ki, fevralın son günlərindən başlayaraq bu günə qədər Əlbürz əyalətində saxta spirtli içkilərdən zəhərlənənlərin sayı, 147-ə, ölənlərin sayı isə 31 nəfərə yüksəlib.

Bir daha bildiririk ki, koronavirus insan bədəninə tənəffüs mukozası (burun, traxeya və ağciyər hüceyrələri), eləcə də ağız və gözlər yolu ilə daxil olur. İçilən spirt isə birbaşa mədəyə gedir və onun virusa hər hansı bir təsiri yoxdur. Daha doğrusu, spirtli içkilər koronavirusa yoluxmanın qarşısını almır” -deyə, Əlbürz əyalətinin Təcili Tibbi Yardım Mərkəzinin rəisi Mehrdad Babayi bəyan edib.

Qeyd edək ki, son həftələr İranın müxtəlif şəhər və əyalətlərində koronavirus infeksiyasından qorunmaq və stressdən qurtulmaq üçün spirtli içkilərə pənah aparan insanların sayı sürətlə artıb. Nəticədə, minlərlə insan saxta spirtdən zəhərlənərək xəstəxanalara düşüb, yüzlərlə insan isə həyatını itirib.

A.M