Koronavirusla bağlı həqiqətləri əks etdirən Güney Azərbaycan mediasına təzyiq göstərilir

SON XƏBƏRLƏR

Koronavirusla bağlı həqiqətləri əks etdirən Güney Azərbaycan mediasına təzyiq göstərilir

2021.10.20, 07:36

Gunaz.tv

GünAz TV: Güney Azərbaycanın Urmiya şəhərinin millət vəkili koronavirusla bağlı həqiqətləri əks etdirən Qərbi Azərbaycan əyalətinin KİV-lərinə “ultimatum" verildiyini açıqladı.

Bu barədə öz İnstagram səhifəsində məlumat yayan Hadi Bahaduri bildirib ki, Qərbi Azərbaycan əyalətində koronavirusa yoluxanların sayı gün keçdikcə artır.

“Urmiyanın Taliqani xəstəxanası koronavirus xəstəliyinin müalicəsi üçün nəzərdə tutulub”- deyən millət vəkili əlavə edib ki, bu xəstəxanada KT aparatı olmadığı üçün xəstələr Xomeyni xəstəxanasına müraciət etməyə məcbur olur, bu isə həm xəstəxanada çalışanların, həm digər insanların sağlamlığını təhlükəyə salır.

“Halbuki elə ilk başdan Xomeyni xəstəxanası koronavirus xəstələrinin müalicəsi üçün nəzərdə tutula bilərdi”- Bahaduri artırıb.

O həmçinin bildirib ki, həkimlər və səhiyyə işçiləri imkanlar və tibbi avadanlığın çatışmazlığından narazıdır.

Həkimlərə münasib maska və fərdi qoruyucu vasitələrin verilmədiyini açıqlayan millət vəkili qeyd edib ki, səhiyyə işçiləri xəstəliyə yoluxmamaq üçün özləri maska almaq məcburiyyətindədir.

“Əyalətin millət vəkili olaraq həqiqətləri gizlətmədən şəffaf şəkildə açıqlamalıyam” deyən Bahaduri gerçəklərin ört-basdır edilməsini və mediaya təzyiq göstərilməsini tənqid edib.

Ötən günlərdə Ərdəbil əyalətinin səhiyyə xidmətinin rəhbəri doktor Qüdrət Əxəvan Əkbəri və Ərdəbil “İmam” xəstəxanasının direktoru doktor İsmayıl Fərzanə verdikləri açıqlamalara görə işdən çıxarıldılar.

İran polisi koronavirus qurbanlarının sayı barədə sosial şəbəkələrdə gerçək məlumat yayan vətəndaşları da həbs edir.

Bəzi mənbələrə görə, İran Məhkəmə Sisteminin sədri İbrahim Rəisi Səhiyyə nazirliyindən koronavirus pandemiyasından dünyasını dəyişən şəxslərin ölüm səbəbini gizlətməyə, onların ölümünü digər xəstəliklərin adı ilə təqdim etməyə çağırıb. O, həmçinin nazirlikdən "sosial şəbəkələrdə yayılmış statistikaların idarə edilməsi" və "koronavirusdan ölənlərlə bağlı xəbərlərlə mübarizə" istiqamətində onlarla əməkdaşlıq etməyi tələb edib.

Ü.F