Məhəmmədbağır Qalibaf: “Benzin etirazlarına əsas səbəb dövlətin səriştəsizliyidir”

SON XƏBƏRLƏR

Məhəmmədbağır Qalibaf: “Benzin etirazlarına əsas səbəb dövlətin səriştəsizliyidir”

2021.10.20, 07:36

Gunaz.tv

GünAz TV: İran Ali Məsləhət Şurasının üzvü Məhəmmədbağır Qalibaf ölkədə ötən ay keçirilmiş etirazlara münasibət bildirib.

O, bu gün iştirak etdiyi tədbirdəki çıxışı zamanı bildirib ki, benzinin bahalaşdırılmasına qarşı baş tutmuş xalq nümayişlərinə əsas səbəb dövlətin səriştəsizliyidir. Son etirazların keçmişdəkilərdən fərqləndiyini deyən Qalibaf “bəzi qüvvələrin bu vəziyyətdən istifadə edərək, dini lider və siyasi sistemlə xalq arasında mövcud bağları yox etməyə çalışdığını” iddia edib. O, həmin rəsmilər və ya qurumların adlarını çəkməyib.

“Ölkənin hazırki vəziyyəti iqtisadi sabitliyin olmaması üzündəndir. Dövlət adamları əməli addım atmaq əvəzinə, İnstex, FATF və digər bu kimi mexanizmlərin icra olunmasını gözləyirlər”, - deyə Qalibaf əlavə edib.

O, həmçinin Əli Xamneyinin prezidentin istefası ilə bağlı sözlərini xatırladaraq, islahatçılar başda olmaqla, Həsən Ruhaninin istefasını tələb edənləri “düşmənin mənafeyinə xidmət etməkdə” günahlandırıb.

Qalibaf sonda Milli Məclisin və dövlətin səmərəsiz fəaliyyətini bir daha tənqid edib və qeyd edib ki, “biz mövcud vəziyyətdən çıxmaq üçün yorulmuş dövləti işləməyə məcbur etməliyik”.

Qeyd etmək lazımdır ki, İranda benzinin qiymətinin artırılmasından sonra dövlətin müxtəlif qurumları, xüsusilə də Milli Məclis və Ali Məsləhət Şurası arasında ixtilaflar dərinləşib. Deputatlar iqtisadiyyatın bu cür ağır vəziyyətə düşməsini Ali Məsləhət Şurasının FATF layihələrinin qəbulunu gecikdirməsi ilə əlaqələndirirlər.

Digər tərəfdən, Xamneyi başda olmaqla, ölkənin əksər rəsmiləri etirazlara görə Qərb dövlətləri və İran rejiminin bəzi müxaliflərini günahlandırırlar. Qalibafın da çıxışı zamanı onların iddialarını bir daha təkrarlamasına baxmayaraq, o, çıxışı zamanı əsas etibarilə etirazlara təkan verən əsas amilin dövlətin səriştəsizliyi olduğunu vurğulayıb.

Ə.A