Məlikan Prokurorluğu millət vəkilinin cinsi təcavüzünə məruz qalan qızın şikayətini qəbul etməyib

25.08.2018, 13:37

GünAz TV: Məlikan (Məlik kəndi) Prokurorluğu bu şəhərin sözdə millət vəkili Salman Xudadadi tərəfindən cinsi təcavüzə məruz qalan qızın şikayətini qəbul etməkdən imtina edib.

 

“Herana” xəbər agentliyinin yaydığı məlumata görə, İran Parlamenti İctimai Komissiyasının rəisinin cinsi təcavüzünə məruz qaldığını deyən 28 yaşlı qız Konstitusiyaya Nəzarət Şurası, Parlamentin Təhlükəsizlik Bölümü və Deputatların  Davranışlarına Nəzarət edən Komissiyaya şikayət etdikdən sonra bu dəfə Məlikan Prokurorluğuna şikayət edib. Lakin ona şikayəti prokurorluğun səlahiyyətində deyil deyə avqustun 6-da rədd cavabı verilib.

 

Şikayətçi qız Konstitusiyaya Nəzarət Şurasına müraciət etdiyi zaman ilk öncə ona müsbət cavab verilib, hətta ona qurum tərəfindən vəkil tutulacağı da deyilib. Lakin sonra bildirilib ki, mövzu ilə bağlı prokurorluğa müraciət olunmalıdır. Hazırda  Konstitusiyaya Nəzarət Şurası və parlamentin təhlükəsizlik bölümünün də şikayətə baxmayacağı barədə nigaranlıqlar artıb.

 

Qeyd etdiyimiz qurumların soyuq münasibəti ilə üzləşən gənc qız sonralar (tir ayında) Məlikan Prokurorluğuna müraciət edib, orada Ettelaat məsulları, “Sepah” üzvləri və prokuror tərəfindən ətraflı şəkildə dindirilib. Prokurorluqda təcavüzə məruz qalan qıza vəd verilib ki, məsələ kütləvi informasiya vasitələrinə çıxarılmasa, şikayətinə baxılacaq. Məsulların verdiyi vədə rəğmən prokurorluğa rəsmi şikayət edildiyi zaman “bu məsələ prokurorluğun səlahiyyətində deyil” deyə şikayətə baxılmayıb.

 

“Herana” bundan əvvəl mövzu ilə bağlı S.Xudadadinin Səs Faylını yaymışdır. Həmin Faylda S.Xudadadi sözügedən qızla danışır və ona təcavüz etdiyini etiraf edir. İlk öncə qızla küçə söyüşləri ilə danışan millət vəkili sonra ondan xahiş edir ki, “Herana” ilə əlaqə saxlayaraq aralarında olub-bitənləri təkzib etsin.

 

Rejimin sifarişi ilə Güney Azərbaycanın Məlikan şəhərinə millət vəkili seçilən S.Xudadadi bundan əvvəl Məlikan “Sepah”-nin komandiri, Ərdəbil Ettelaat Şöbəsinin rəisi, Şərqi Azərbaycan Ettelaat İdarəsinin rəis müavini və s. kimi həssas postlarda çalışıb. O hazırda İran Parlamentinin İctimai Komissiyasının rəisidir.

S.Xudadadi ötən illərdə Azərbaycan Milli Hərəkatı fəallarına qarşı müxtəlif yollarla təzyiq göstərib, onların bir neçəsini həbs etdirib.

 

N.S

Post | Gunaz article thumb

Paylaş :

Post | Gunaz article social Post | Gunaz article social Post | Gunaz article social Post | Gunaz article social Post | Gunaz article social Post | Gunaz article social
Şərhlər
Şərh Yaz