Amerikalı senatorlardan ibarət iki partiyalı bir qrup sentyabrın 30-da İranın əxlaq polisi tərəfindən Məhsa Əmininin öldürülməsini və polis və təhlükəsizlik qüvvələri tərəfindən İranda xalq etirazlarının yatırılmasını pisləyən qətnamə layihəsi təqdim edib.
"Senatın İnsan Haqları üzrə İşçi Qrupunun həmsədri kimi mən insan haqlarını, o cümlədən İran qadınlarının hüquqlarını müdafiə etmək üçün həyatlarını riskə atan minlərlə cəsur etirazçıları yüksək qiymətləndirirəm.
Əxlaq polisi tərəfindən Məhsa Əmininin öldürülməsinə ictimai reaksiya açıq şəkildə göstərir ki, İran rejiminin zülmü bu ölkə xalqının ləyaqət və şərəf tələbləri ilə uyğun gəlmir",- deyə, Delaver ştatının demokrat senatoru Kris Kuns bildirib.
Onlarla respublikaçı və demokrat senator tərəfindən dəstəklənən qətnamə layihəsi Amerika prezidenti Co Bayden administrasiyasının İranla 2015-ci il nüvə sazişini canlandırmaq üçün danışıqlar prosesində olduğu bir vaxta təsadüf edir.
Amerikalı qanunvericilər "Associated Press"-ə bildiriblər ki, qətnamə İslam Respublikasına Amerikanın qadınların hüquqlarını və dinc etiraz hüququnu dəstəklədiyinə dair “aydın və birmənalı mesaj” göndərməyə çalışır.
Cavidan
