NATO yenə əsgər istəyir Azərbaycan Əfqanıstanın bərpası üzrə layihələrdə iştirak etməyə hazırdır NATO Azərbaycanın Əfqanıstandakı quruculuq prosesində mülki iştirakını istəyir. Bunu Alynasın baş katibinin xüsusi nümayəndəsi Robert Simmons Brüsseldə bəyan edib. Məlum olduğu kimi, Azərbaycan 2002-ci ildən Əfqanıstandakı sülhyaratma əməliyyatlarında iştirak edir. Ötən ilin sonlarında Milli Məclis oradakı sülhməramlıların sayını artırmağa qərar verib: 22-dən 44-dək. Bu yaxınlarda isə Azərbaycan XİN Əfqanıstandakı kontingentin tərkibinin daha iki dəfə artırılaraq 100-ə çatdırılması üçün parlamentə müraciət edib. Bakı bunu Kovosodakı siyasi dəyişiklikdən sonra oradan hərbçilərini çıxarması ilə əsaslandırıb. Simmons deyib ki, "əsgərlərin digər missiyalar üzrə artırılması ilə bağlı növbəti addımlar atılarsa, bu, Bakının Əfqanıstandakı sülhyaratma prosesinə verdiyi töhfəni artıracaq". O diqqəti buna yönəldir ki, sülhməramlılar bir sıra bərpa layihələrinə də cəlb olunurlar. Eyni zamanda, NATO istəyir ki, Azərbaycan mülki səviyyədə də Əfqanıstanın quruculuğunda iştirak etsin. Dünən "Ekspress"in xahişi ilə ölkənin xarici siyasət idarəsi məsələyə münasibətini açıqlayıb. "Azərbaycan öz imkanları daxilində Əfqanıstanın bərpası üzrə mülki layihələrdə yardım göstərməyə hazırdır", -deyə XİN mətbuat katibi Xəzər İbrahim ənənəvi mətbuat konfrasında bəyan edib. O diqqəti buna yönəldib ki, Azərbaycan sülhməramlı əməliyyatda aktiv iştirak edir. Bununla belə, Bakı və Kabul arasında Azərbaycanın inkişaf layihələrində iştirakı, təhsil sahəsində əməkdaşlıq haqqında danışıqlar aparılır. Qeyd edək ki, Simmons tezliklə Bakıya gələcək. O, Azərbaycan rəsmiləri ilə İraqdakı sülhməramlıların artırılması məsələsini də müzakirə etməyə hazırlaşır. Maraqlıdır ki, xüsusi nümayəndə Azərbaycanın martda sülhməramlılarını Kosovodan çıxarılması barədə suala cavabda bir daha deyib ki, Bakının bu addımı "oradakı siyasi vəziyyətin dəyişməsinə adekvat deyil". Simmons onu da bəyan edib ki, NATO Xəzərin enerji resurslarının Avropaya təhlükəsiz nəqlində Azərbaycanın təcrübəsini artırmaq istəyir: "Əlbəttə ki, söhbət NATO-nun bölgəyə qoşun göndərməsindən getmir. Biz sadəcə, Azərbaycanın təhlükəsizlik qurumlarının idarəçilik bacarıqlarının artırılmasında iştirak etmək istəyirik". NATO rəsmisi vurğulayıb ki, Azərbaycan alyansa üzvlük üçün müraciət edərsə, onlar bunu nəzərdən keçirməyə hazırdırlar: "Bu yaxınlarda NATO Şurası Azərbaycanla Fərdi Tərəfdaşlıq üzrə Əməliyyat Planının (IPAP) 2-ci mərhələsini təsdiqləyib. NATO rəhbərliyi hesab edir ki, bu proqram inteqrasiya ilə paralel şəkildə aparılmalıdır. Yzvlük üçün isə intensiv dialoq lazımdır. Hazırda Azərbaycanla bu yoxdur". Qeyd edək ki, IPAP-ın ikinci mərhələsi yeni məqsədlər də qoyur. Burada Sərhəd Xidməti, Daxili İşlər, Milli Təhlükəsizlik və Fövqəladə Hallar nazirliklərinin də iştirakı nəzərdə tutulur. Orduya mülki nəzarətin artırılması üçün gələcəkdə mülki orqanlar - məsələn, parlament də bu işə cəlb olunacaq. NATO açıqlayıb ki, yeni mərhələdə Azərbaycanda orduya mülki, və xüsusən də parlament tərəfindən nəzarətin gücləndirilməsi, ölkədə hüquq normalarının bərqərar olunmasına diqqət yetiriləcək. Bu əməkdaşlıq bilavasitə orduya da aid olacaq. "Biz Azərbaycan ordusunun hissələrinə sülhməramlı əməliyyatlar zamanı digər ölkələrin orduları ilə birgə fəaliyyət göstərməyi öyrədəcəyik. NATO Azərbaycanın hərbi təlim və təhsil sistemində islahatların aparılmasına kömək edəcək ki, onlar qərb standartlarına çatsın", - Simmons deyib. Ə.Raufoğlu express