Güney Azərbaycan şəhərlərində müəllimlərin etiraz aksiyaları keçirilib-VİDEO

SON XƏBƏRLƏR

Güney Azərbaycan şəhərlərində müəllimlərin etiraz aksiyaları keçirilib-VİDEO

2021.11.11, 17:16

Gunaz.tv

Ümumilikdə 50 şəhərdə keçirilən aksiyalarda hal-hazırda çalışan müəllimlərlə yanaşı təqaüdə çıxan təhsil işçiləri də iştirak ediblər.

İran Azad Həmkarlar İttifaqının verdiyi məlumata görə, aksiyalar zamanı bir sıra müəllimlər saxlanılıb və polis məmurları tərəfindən döyülüb.

Aksiyalar İran Təhsil İşçiləri Dərnəkləri Koordinasiya Şurasının noyabrın 11-ə etiraz aksiyalarının keçirilməsi ilə bağlı çağırışından sonra baş tutub.

İranın müxtəlif şəhərlərində, o cümlədən Güney Azərbaycanın Həmədan, Zəncan, Ərdəbil, Təbriz, Qəzvin və Culfa şəhərlərində müəllimlər Təhsil Nazirliyinin yerli nümayəndəlikləri qarşısına toplaşıblar.

Onlar müəllimlər və təhsil sahəsində çalışanların hüquqlarının pozulmasına, ölkənin illik büdcəsindən təhsil sahəsinə cüzi məbləğin ayrılmasına etiraz edib, rütbələndirmə qanununun icra olunmasını, təqaüdlərin bərabərləşdirilməsini tələb ediblər.
Narazılar həmçinin fəal müəllimlərin həbs olunmasına da etirazlarını bildiriblər.

Noyabrın 11-də İran Təhsil İşçiləri Dərnəkləri Koordinasiya Şurasının dərc etdiyi ümumölkə mitinqinin yekun bəyanatında təhsil işçiləri və təqaüdçülər üçün “Dövlət Qulluğunun İdarə Edilməsi haqqında” Qanunun icrasının 14 il gecikdirilməsi, etiraz aksiyası keçirmək hüququnun pozulması, etirazçılara qarşı sərt təhlükəsizlik tədbirlərinin tətbiq edilməsi, uzunmüddətli həbslər, döyülmə, ölkədən qovulma, deportasiyaya və müxtəlif məhrumiyyətlərə məruz qalmaları tənqid edilib.

Qeyd edək ki, yeni təhsil ilinin başlanmasından bu günə kimi müəllimlər oxşar istəklərlə dəfələrlə aksiyalar keçiriblər.

C.E