Pompeo İrana qarşı silah satışı embarqosunun vaxtının uzadılması üçün hüquqi dəlillər hazırlayır

SON XƏBƏRLƏR

Pompeo İrana qarşı silah satışı embarqosunun vaxtının uzadılması üçün hüquqi dəlillər hazırlayır

2021.10.20, 07:36

Gunaz.tv

GünAz TV: Amerika Birləşmiş Ştatlarının Dövlət Departamentinin rəhbəri Mayk Pompeo Birləşmiş Millətlər Təşkilatının Təhlükəsizlik Şurasının rəsmi Tehrana qarşı qəbul etdiyi silah satışı sanksiyasının müddətini uzatmaq və daha da şiddətləndirmək üçün hüquqi sübutlar hazırlayır.

"New York Times" qəzetinin məlumatına görə, Pompeonun hazırladığı layihə ötən bir neçə gün ərzində Tramp administrasiyasının rəsmiləri tərəfindən nəzərdən keçirilib.

Rəsmi Vaşinqton nüvə razılaşmasını tərk etsə də, sənəddə qanuni olaraq hələ də razılaşma tərəflərindən biri olduğunu qeyd edib.

"New York Times" bildirir ki, əgər İrana qarşı silah embarqosunun müddəti uzadılmasa, ABŞ Hərtərəfli Birgə Fəaliyyət Planının (Bərcam-red.) tərəflərindən biri olaraq, rəsmi Tehrana qarşı 2015-ci ildən əvvəlki səviyyədə neft satışı və bank sektorlarında yenidən sanksiyalar tətbiq etmək haqqından yararlanacaq.

BMT Təhlükəsizlik Şurasının 2015-ci ildə İranla 5+1 ölkələri arasında imzalanmış nüvə razılaşmasına əlavə olaraq qəbul etdiyi 2231 saylı qətnamə 5 il müddətində dünya ölkələrinə İranla silah ticarətini qadağan edir. Bu sanksiya İranın nüvə proqramının dinc olduğu sübuta yetirildiyi təqdirdə, cari ilin oktyabr ayının 18-də sona çatacaq.

Pompeo aprelin 20-də "Twitter" səhifəsində yazdığı statusda da TŞ-nın İranın Yaxın Şərqdə silahlanma yarışını başlatmasına imkan verməyərək, sözügedən qadağaları uzatmağa çağırmışdı.

"New York Times" məlumatında həmçinin qeyd edir ki, TŞ-nın embarqonu uzatmasına qarşı Rusiyanın birbaşa, Çinin isə dolayısı ilə qarşı çıxacağı proqnozlaşdırılır. Çünki bir müddət əvvəl ruslar avropalı və amerikalı rəsmilərə İrana silah sataraq, böyük miqdarda maddi mənfəət əldə etmək niyyətinin olduğunu bəyan edib.

Ə.A