İranın peyk raket buraxılış sistemi dağıdılıb

SON XƏBƏRLƏR

İranın peyk raket buraxılış sistemi dağıdılıb

2022.03.02, 11:31

Gunaz.tv

İran İslam İnqilab Keşikçiləri Korpusuna (SEPAH) bağlı strateji əhəmiyyətli raket buraxılışı kompleksində partlayış baş verdiyi barədə məlumatlar yayılıb.

“Maxar Satellite Company” tərəfindən yayılan görüntülər İranın Simnan əyalətində “Xomeyni” kosmik terminalının raket buraxılış sahəsinin ətrafının qara rəngdə olduğunu göstərir.

Terminalın bu durumda olması orada partlayışın baş verdiyi ehtimalını gücləndirir və İran hökumətinin orbitə peyk raketi buraxmaq cəhdinin növbəti dəfə iflasa uğradığını təsdiq edir.

İran rəsmiləri bundan öncə adı çəkilən yerdən peyk raketi buraxacaqları barədə danışmaqlarına baxmayaraq, indi baş verən partlayış və raketin buraxılıb-buraxılmaması barədə açıqlama vermirlər.

Qeyd edək ki. fevralın 14-də İranın Kirmanşah əyalətinin Mahidəşt şəhəri yaxınlığında yerləşən İran İslam İnqilab keşikçiləri Korpusunun (SEPAH) qərargahındakı yanğın barədə məlumat yayılıb.

“Plant” şirkətinin yaydığı peyk görüntülərindən SEPAH-ın Mahidaşt şəhərindəki raket buraxılış sistemləri və hərbi pilotsuz təyyarələrinin saxlanıldığı mərkəzin məhv edildiyi görünür.

İran rəsmilərinin yanğının mühərrik yağı və başqa alışıcı maddələrin saxlanıldığı anbarda baş verdiyini söyləmələrinə baxmayaraq, İsrail mediası hücumun "Mossad" tərəfindən həyata keçirildiyini yazıb.

C.E