Xarici İşlər Nazirliyinin sözçüsü Səid Xətibzadə fevralın 7-də Tehranda keçirdiyi mətbuat konfransında kampaniyanı “İran xalqının kimliyi və fars dilinə qarşı bir müharibə” kimi dəyərləndirib.
O, kampaniyaya qatılanları “iblis” adlandırıb.
Dövlət agentliyi İRNA-nın mövzu ilə bağlı yayımladığı reportajda kampaniyanın “Britaniya və Səudiyyə konspirasiyası” olduğu iddia edilib. İRNA BBC Fars xidməti və Səudiyyə Ərəbistanının maliyyələşdirdiyi farsdilli mediada dərc edildiyinə istinadən bu iddianı irəli sürüb.
Türk dil haqları fəallarının təqribən bir həftə əvvəl başlatdığı “Mən və Farsca” kampaniyası qısa müddətdə müxtəlif qeyri-fars icmalarına mənsub minlərlə sosial media istifadəçisinin dəstəyini alıb.
Bir həftədən artıqdır ki, İranın türk, ərəb, kürd, türkmən, bəluç, gilək, lur və digər etnik icmalarına mənsub minlərlə istifadəçi həyatlarının müxtəlif dönəmlərində yaşadıqları ayrı-seçkiliklərə dair təcrübələrini “Mən və Farsca” həştəqi ilə paylaşırlar.
Bəzi milliyyətçi iranlılar bu kampaniyaya qarşı “Farscanın qəndi” həştəqi ilə əks-kampaniya başladıblar.
Tehranda nəşr edilən bir çox media orqanı “Mən və Farsca” kampaniyasını ilk səhifələrində gündəmə gətirib, onu “fars dilinə qarşı bir sui-qəsd” olduğunu iddia ediblər.
C.E
