İranda etirazçılara qarşı repressiyalarla bağlı BMT-nin İnsan Haqları Şurasının iclası keçiriləcək

SON XƏBƏRLƏR

İranda etirazçılara qarşı repressiyalarla bağlı BMT-nin İnsan Haqları Şurasının iclası keçiriləcək

2022.11.24, 14:00

Gunaz.tv

Bununla yanaşı iclasda İranda insan hüquqlarının pozulması ilə bağlı beynəlxalq faktaraşdırma komitəsinin yaradılması məsələsini səsə qoyulacaq.

BMT-nin Cenevrədəki mənzil-qərargahında keçiriləcək bu fövqəladə toplantıda Beynəlxalq Əfv Təşkilatı, İran İnsan Haqları Təşkilatı, Bəhai Beynəlxalq İcması, İran İnsan Haqları Sənədləşdirmə Mərkəzi, Maddə 19, Qurbanların Müdafiəsi Təşkilatı daxil olmaqla bir sıra insan haqları təşkilatlarının nümayəndələri çıxış edəcəklər.

Hazırda Tehranın Evin zindanında məhkumluq dövrünü yaşayan güney azərbaycanlı insan haqları müdafiəçisi Nərgiz Məhəmmədi iclas iştirakçılarına məktub ünvanlayıb.

O, məktubunda İslam Respublikası hakimiyyətinin etirazçıları, qadınları və uşaqları öldürüb bunu inkar etməsi barədə açıqlamalar verib.

Həmçinin, bu görüş ərəfəsində Amerikanın BMT İnsan Haqları Şurasındakı daimi nümayəndəsi iranlı fəallarla görüşünə işarə edib.

“BMT İnsan Haqları Şurasının repressiyalara reaksiya verməsi üçün indiki vaxtdan yaxşı vaxt yoxdur. İran xalqının cavabdehlik tələb etmək hüququ var”,-deyə, o bildirib.

İndiyədək Birləşmiş Millətlər Təşkilatının İnsan Haqları üzrə Ali Komissarlığının sözçüsü İranda etirazçıların öldürülməsinə bir neçə dəfə reaksiya verib.

BMT-nin İnsan Haqları Şurasının İrandakı xalq üsyanı ilə bağlı iclası Avropa Parlamentində keçirilən oxşar iclasdan iki gün sonra keçiriləcək.

Avropa Parlamentinin iclasında Avropa Parlamentinin nümayəndələri İran xalqının inqilabi qiyamını dəstəkləyərək, İran İnqilab Keşikçiləri Korpusunun terror təşkilatları siyahısına daxil edilməsini və həmçinin İslam Respublikasının Avropa Birliyi ölkələrindəki səfirliklərinin bağlanmasını tələb ediblər.

Timur