Seyid Həsən Amili Azərbaycana qarşı sərsəm fikirlər səsləndirib

SON XƏBƏRLƏR

Seyid Həsən Amili Azərbaycana qarşı sərsəm fikirlər səsləndirib

2022.09.03, 06:39

Gunaz.tv

Sentyabrın 2-də cümə namazı çıxışında ərdəbilli axund birinci Qarabağ savaşı zamanı İranın Azərbaycana dəstək verdiyinə dair ənənəvi iddiaları bir daha təkrar edib.

O, birinci və ikinci Qarabağ müharibəsi dövründə Tehran hökumətinin Azərbaycanın yanında olduğu barədə fikirlər səsləndirib, Azərbaycan-Naxcıvan Muxtar Respublikası arasında əlaqə yolunun İrandan keçməsini əvəzsiz dəstək kimi vurğulayıb.

Seyid Həsən Amili Azərbaycan mediasının İran və İran rəhbərinə qarşı təhqiramiz çıxışlarının arxasında başqa qüvvələrin durduğu barədə fikirlər səsləndirib.

O, xüsusilə son vaxtlar Azərbaycan Respublikasında millətçi qrup və cərəyanların fəallığının artmasından narahatlığını bildirib və bu cərəyanların İran rəhbərinə qarşı çıxışlarını şübhəli hesab edib.

Amili Azərbaycan xalqına sual ünvanlayaraq onları bu barədə düşünməyə çağırmaqla yanaşı azərbaycanlıları nankorluqda ittiham edib.

Ərdəbilin cümə imamı quran "Əl-Rəhman" surəsinin 60-cı "Sizdə yaxşılığın cavabı yaxşı olmayan əməllərləmi verilir" ayəsini oxuyaraq azərbaycanlıları İranın yaxşılıqlarına pisliklə cavab verdiklərini iddia edib.

xaməneyinin Ərdəbildəki nümayəndəsi Azərbaycan dövlətinin mövqeyini əks etdirən media orqanlarında da İran rəhbərinə qarşı təbliğat aparıldığını deyib və bunların arxasında "Sionist rejim"in olduğu barədə ənənəvi fikirlərini təkrarlayıb.

Seyid Həsən Amili çıxışının davamında bir daha Naxcıvanı Azərbaycanla birləşdirən yoldan danışıb, Tehran rəsmilərinin Zəngəzur dəhlizi ilə bağlı narahatlıqlarını paylaşdığını biruzə verib.

O, köhnə yoldan başqa hazırda İranda Azərbaycanı Naxcıvan və Türkiyə ilə birləşdirəcək yeni yolun inşa edildiyini deyib və bunun tərəflər üçün ən sərfəli yol olduğunu iddia edib.

Cavidan