“Sepah” komandanının müavini Məhəmmədrza Nəqdinin idarəsində 2 İsrail “casus”unun həbs edildiyilə bağlı xəbərlər yayılıb- FOTO

SON XƏBƏRLƏR

“Sepah” komandanının müavini Məhəmmədrza Nəqdinin idarəsində 2 İsrail “casus”unun həbs edildiyilə bağlı xəbərlər yayılıb- FOTO

2021.10.20, 07:36

Gunaz.tv

GünAz TV: Bir neçə gün öncə “Sepah” terror təşkilatının komandanının koordinasiya məsələləri üzrə müavini Məhəmmədrza Nəqdinin tabeliyində olan 2 əməkdaşın İsrailə “casusluq” ittihamı ilə həbs edildiyilə bağlı xəbərlər yayılmışdı.

Məhəmmədrza Nəqdi 2 casusun həbs edilməsini təkzib edib və bildirib ki, Behzad Nəbəvini “bu cür yalan məlumatlar” yaydığına görə məhkəməyə verəcək. O, məsələ ilə bağlı geniş açıqlama verməyib.

Casusların tutulması ilə bağlı fikirləri Ali Məsləhət Şurasının üzvü Əhməd Təvəkkülüyə bağlı, mühafizəkar “Əlif” agentliyilə müsahibə zamanı Behzad Nəbəvi səsləndirmişdi. O, Nəqdinin rəhbərlik etdiyi qurumda iki İsrail “casusu”nun tutulduğunu və onlardan birinin edam edildiyini demişdi.

Agentlik bir müddətdən sonra Nəqdinin adını müsahibənin mətnindən silsə də, digər informasiya resursları mətni olduğu kimi saxlamışdı.

Bundan öncə də Məhəmmədrza Nəqdinin idarəsində İsrail “casusları”nın tutulmasıyla bağlı dəfələrlə məlumatlar yayılıb. 2015-ci ilin may ayında Parisdə yaşayan siyasi aktivist Rza Əlicani “Sepah”, “ETTELAAT” və “Bəsic” qüvvələrində çalışan 30 nəfərin İsrailə “casusluq” etikləri üçün həbs edildiyi barədə məlumat yaymışdı. O, tutulanlardan birinin Məhəmmədrza Nəqdinin “Bəsic” qüvvələrinə rəhbərlik etdiyi dövrdə sürücüsü olmuş şəxsin olduğunu əlavə etmişdi.

Rza Əlicani

Nəqdi 2009-cu ilin sentyabrından 2016-cı ilin noyabrına qədər “Bəsic” qüvvələrinin komandanı olub. O, cari ilin aprel ayından Əli Xamneyinin fərmanıyla “Sepah” komandanının koordinasiya məsələləri üzrə müavini kimi mühüm və strateji posta təyin edilib.

Əlicani həmçinin qeyd etmişdi ki, “Sepah”ın Kəşfiyyat İdarəsinin və “ETTELAAT”ın İsrail üzrə şöbələrinin rəhbərləri də bu ölkəyə “casusluq” ittihamı ilə həbs edilən şəxslər içərisindədirlər. "Sepah"ın sözügedən şöbəsinin rəhbəri aparılan sorğudan sonra edam edilib.

İran prezidentinin Milli Məclis işləri üzrə müavini olmuş Məcid Ənsari isə 2016-cı ilin 25 mayında parlamentin iclasında “Sepah”ın Kəşfiyyat İdarəsinin həssas postlara rəhbər təyin edilən zaman məlumat mənbəyi kimi qanuna daxil edilməsini istəyən deputatlara xitabən demişdi: “O idarədə casusluq etdiyinə görə həbs və edam edilən şəxs olub.”

Ənsarinin bu sözləri müəyyən dərəcədə Əlicaninin səsləndirdiyi iddialarla üst-üstə düşür.

Son illər Məhəmmədrza Nəqdinin işçilərindən bir neçəsinin İsrailə “casusluq” ittihamı ilə həbs edilməsi İran siyasi elitası içərisində onun özünə qarşı da şübhələrin yaranmasına səbəb olub.

Ə.A