Xətibzadə, Nətənz nüvə təsisatı yaxınlığında partlayışın İsrail tərəfindən törədilməsi ilə bağlı cəmiyyətdə və sosial şəbəkələrdə yayılan məlumaqtları təkzib edib.
“Əgər İsrail Nətənz təsisatında təxribat törətmiş olsaydı bu barədə ölkə əhalisinə məlumat verərdik.
Lakin, təsisatda baş vermiş partlayışın səsinin eşidilməsi ilə bağlı mən İran silahlı qüvvələri baş qərargahının və Ali Milli Təhlükəsizlik Şurasının bununla bağlı yaydığı məlumatına heç nə əlavə edə bilməyəcəyəm”, -deyə İran Xarici İşlər Nazirliyinin sözçüsü Səid Xətibzadə bildirib.
Xətibzadə həmçinin İranın Qərblə Vyanada apardığı nüvə müzakirələri məsələsinə də toxunaraq, iddia edib ki, İranın nümayəndə heyəti ciddi bir iradə ilə danışıqlara qatılıb.
“Biz yaxşı bir razılaşmasının əldə olunması üçün danışıqlara qatılmışıq və hesab edirəm ki, belə bir razılaşma yalnız nüvə razılaşmasını imzalamış tərəflərin saziş çərçivəsində öz üzərlərinə götürdüyü öhdəlikləri yerinə yetirməsi ilə mümkün ola bilər”, -deyə Səid Xətibzadə bəyan edib.
Xətibzadə danışıqların cari həftənin sonlarında yenidən davam etdiriləcəyini vurğulayıb.
Xatırladaq ki, dekabrın 4-ü axşam saat 20:15 radələrində İranın İsfahan əyalətində yerləşən Nətənz nüvə təsisatının 20 kilometrliyində güclü partlayış olub.
Sosial şəbəkələrdə yayılan xəbərə görə, Badrud şəhərinin Abbasabad kəndi yaxınlığında baş verən dəhşətli partlayışın ardınca səma nura qərb olub, partlayışdan əmələ gələn qalın tüstü məntəqəni bürüyüb.
İran rəsmiləri əvvəlcə partlayışın mənşəyi barədə ziddiyyətli məlumatlar yaysalar da, sonradan bu məntəqədə hava hücumundan müdafiə sisteminin qabiliyyətini yoxlamaq üçün bir raketi sınaqdan keçirdiklərini iddia ediblər.
A.M
