GünazTV: Amerika prezidenti Donald Tramp aprelin 1-də Ağ Evdə jurnalistlərlə görüşündə hökumətinin İrana qarşı tətbiq etdiyi sanksiyaların ləğv olunması şərtindən və rəsmi Tehranla müzakirələrin vacibliyindən danışıb.
Tramp, jurnalistlərdən birinin ona verdiyi “İran hökuməti koronavirus problemi ilə üz-üzə qaldığı bir vaxtda siz hansı bir şərtlə bu ölkəyə qoyduğunuz sanksiyaları ləğv etməyə hazırsınız” sualını cavablandıraraq deyib ki, bunun üçün İran rəhbərlərinin Vaşinqtonla birbaşa təmasa girməsi yetər: “Baxın, biz iranlılarla müzakirə aparmalıyıq. Hesab edirəm ki, biz çox tez İranla bir saziş haqqında danışıqlar aparmalıyıq. Bunun üçün də onların (İran rəhbərlərinin) görə biləcəyi yeganə iş, bizimlə təmasa girmələridir.
Onlar məğrur insanlardır. Onların rəhbəri də məğrurdur. Eynən hamımız kimi və eynən bizim insanlar kimi. Biz hamımız məğruruq. Onlar üçün telefon dəstəyini götürüb bizimlə əlaqə saxlamaq çətindir. Bəli onlar üçün bizimlə hansısa bir görüşü planlaşdırmaq ağır bir işdir. Lakin düşünürəm ki, onlar öz ölkələrinin problemlərini çoz asan yolla həll edə bilərlər.
Biz, İranla düşmənçilik etmək istəmirik və bunun tərəfdarı da deyilik. Lakin onlar bizimlə düşmənçilik edirlər və buna görə də çox peşman olacaqlar. Hesab edirəm ki, onların görə biləcəyi yeganə iş odur ki, bizimlə təmasa girsinlər və ya kimsədən istəsinlər ki, bu əlaqənin yaranmasında onlara kömək etsin. Bizim aramızda müxtəlif irtibat kanalları var və biz asanlıqla bir-birimizlə təmasda ola bilərik” -deyə, ABŞ prezidenti Donald Tramp İranla münasibətlər barədə Ağ Evdə jurnalistlərin suallarını cavablandırarkən bəyan edib.
A.M
