Güney Azərbaycan Milli Azadlıq Cəbhəsi Zəfər günü ilə bağlı bəyanat yaydı

SON XƏBƏRLƏR

Güney Azərbaycan Milli Azadlıq Cəbhəsi Zəfər günü ilə bağlı bəyanat yaydı

2021.11.05, 14:45

Gunaz.tv

Noyabrın 8-də Azərbaycanın mədəniyyət paytaxtı Şuşa düşmən işğalından azad olundu. Bu qələbə Quzey və Güney Azərbaycanda böyük coşğu ilə qarşılandı.

Güney Azərbaycan Milli Azadlıq Cəbhəsi (GAMAC) Böyük Zəfərin ildönümü ilə bağlı bəyanat qəbul edib.

Bəyanatda deyilir:
”Bir il bundan öncə noyabr ayının 8-də 29 illik işğaldan sonra qəhrəman ordumuz Şuşa şəhərini erməni işğalından azad edərək Azərbaycan tarixinə şərəfli bir gün yazdı.

Qarabağın döyünən ürəyi, musiqi və incəsənət beşiyi olan Şuşanın azad olunması Azərbaycana savaş və siyasət meydanında əsas hədəflərinə çatmaq imkanı yaratdı.

Bununla Azərbaycan öz dövlət sərhədlərinin təmamilə bərpa edilməsi sürəcinə girmiş oldu. Məhz Şuşa qələbəsindən sonrakı mərhələdə diplomatik danışıqlarla erməni işğalçıları Laçın, Kəlbəcər və Ağdam bölgələrindən qeyri-şərtsiz çıxarıldılar”.

Sənəddə bildirilir ki, 44 günlük ikinci Vətən müharibəsində Şuşa ilə bərabər Azərbaycanın digər strateji əhəmiyyətli yaşayış bölgələri də işğaldan azad edildi.

”Azad olunmuş ərazilərimizdə yenidən dalğalanan dövlət bayrağımız millətimizə qürur hissi yaşatmaqla yanaşı, Azərbaycanı regional və qlobal proseslərin önəmli ölkələri sırasına daxil etdi.

Bu sürəcdə Türkiyə dövlətinin mənəvi və hərbi dəstəyini yanına ala bilən Azərbaycan dövləti həm də bunu sübut etdi ki, türk dövlətlərinin birlikdə əməkdaşlıq ideyası gerçək əsaslara dayanır”-deyə, bəyanatda bildirilir.

GAMAC hesab edir ki, 44 günlük savaş sürəcində və ondan sonrakı proseslərdə İranın Azərbaycan dövlətinə qarşı ermənipərəst mövqeyinin qarşısında Güneydə yaşayan soydaşlarımızın müqaviməti Azərbaycanın mənən bütöv olduğunu göstərdi.

"Güneydə çoxmilyonlu Azərbaycan türklərinin dirənişi, Azərbaycan dövlətinə və ordusuna verdiyi dəstək, 200 illik parçalanmaya məruz qalmış bir millətin əslində vahid birlik ideyasının yaşadığını, Bütöv Azərbaycana doğru irəlilədiyini göstərdi.

Ucalıq rəmzi olan azad Şuşa: 29 il sonra tam fərqli 8 may...

Güneyli və quzeyli bütün azərbaycanlıların mədəniyyət beşiyi Şuşanın azad olunduğu gün millətimizin Zəfər günüdür.

Bu, Zəfər tariximizi gerçəkləşdirən şəhidlərimizin ruhu, qazilərimizin və müzəffər Azərbaycan ordusu qarşısında sayğı duruşu günüdür.

Biz GAMAC olaraq Şuşanın Qələbə günü münasibətilə ilə həm savaş, həm də siyasət meydanda cəsarət və müdriklik göstərən Ali Baş Komandan cənab İlham Əliyev başda olmaqla bütün dünya azərbaycanlılarını,

Azərbaycanın müzəffər Ordusunu, qəhrəman qazılərimizi təbrik edir, bu tarixi gündə şəhidlərimizi sayğı ilə anır və onların qəhrəmanlığını alqışlayırıq”.

Ayxan