“Urmiya 90”nın baş məşqçisi komandadan ayrılıb- Səbəb?

SON XƏBƏRLƏR

“Urmiya 90”nın baş məşqçisi komandadan ayrılıb- Səbəb?

2021.10.20, 07:36

Gunaz.tv

GünAz TV: “Urmiya 90” futbol komandasının bacarıqlı baş məşqçisi Vəhid Bəyatlu komandadan ayrılıb.

Ağır maliyyə sıxıntılarına baxmayaraq İran çempionatının I dəstəsinin yarışlarında komandasına uğur qazandıran baş məşqçi sonda klubun imkansızlığı nəticəsində komandadan ayrılmalı olub.

Vəhid Bəyatlunun Savənin “Xoşe Təlayi” klubu ilə müqavilə imzaladığı bildirilir.

Bu barədə “Xoşe Təlayi”nin Teleqram kanalında xəbər yayılıb.

Vəhid Bəyatlu ötən ildən bəri “Urmiya 90” komandasını çalışdırır. O Möhsün Aşurinin yerinə təyin olunmuşdur.

Hal-hazırda 32 xala malik olan “Urmiya 90” bir xal fərqi ilə turnir cədvəlinə liderlik edən komandanı izləyir. Azərbaycan komandası maliyyə sıxıntılarına rəğmən super liqa yarışlarına vəsiqə qazanmaq uğrunda yarışan komandalar arasında ən iddialı klublardan biridir.

Vəhid Bəyatlu ötən günlərdə bildirmişdir ki, o, yalnız indiki oyunçular komandada qalacağı təqdirdə klubla əməkdaşlığını davam etdirəcək. Onun sözlərinə görə, klub oyunçulara olan borcunu ödəyə bilmədiyi üçün onları itirir.

Qeyd edək ik, Qərbi Azərbaycana sırınan radikal kürddilli məsullar “Urmiya 90” klubunun fəaliyyət göstərməsinə qarşıdır. Xüsusi ilə Qərbi Azərbaycan valisi Məhəmməd Mehdi Şəhriyari və Qərbi Azərbaycan Gənclər və İdman İdarəsinin rəisi Abdulla Çəməngülü bunu öz mövqelərində dəfələrlə göstəriblər.

Xatırladaq ki, Məhəmməd Mehdi Şəhriyari Şimali Xorasanın Bocnurd şəhərindən, Abdulla Çəməngülü isə Kürdistan Əyalətinin Səqqiz şəhərindəndir. Bu şəxslər hər zaman Azərbaycana qarşı sərgilədikləri mövqeləri ilə seçilib. Onlar sözdə islahatçı adlanan düşərgə tərəfindən Qərbi Azərbaycan Əyalətində vəzifəyə gətirilib.

N.S