GünAz TV: Güney Azərbaycanın Urmiyə şəhərinin İran parlamentindəki millət vəkili Hadi Bahaduri bəndlərdən müəyyən miqdarda suyun Urmu gölünə buraxılmasını tələb edib. Hazırda Urmu gölünə axmalı olan böyük həcmdə su göldən kənarda bəndlərdə saxlanılır.
Millət vəkili bu barədə martın 6-da İran parlamentinin xəbər agentliyinə danışıb.
“Hazırkı şəraitdə bəndlərin suyunu Urmu gölünə buraxmağın tam zamanıdır. Energetika Nazirliyindən istəyirik ki, ən qısa zamanda buraxılmalı olan suyun Urmu gölünə axıdılması haqda lazımi tədbirlər görülsün. Bu il bəndlərin arxasındakı suyun həcmi ötən illə müqayisədə daha çoxdur, ona görə də suyun buraxılmaması üçün heç bir səbəb yoxdur”- deyə o bildirib.
Energetika Nazirliyi ötən il Urmu gölünə axması nəzərdə tutulan çay sularını bəndlərə yönəldərək gölün quruması istiqamətində daha bir addım atmışdır.
H.Bahaduri Urmu gölünün bərpası ilə bağlı qeyd edib ki, canlandırma işləri çox yavaş irəlləyir. Ötən il göldə suyun səviyyəsinin tarazlığı təxminən 1270.63 metr olub, hazırda isə 1270.59 metrdir. Göldə vəziyyət heç yaxşı deyil, suyun səviyyəsi orta həddən təxminən 4.5 metr aşağıdır.
Qeyd edək ki, hal-hazırda Urmu gölü su hövzəsində 64 su bəndi mövcuddur, 27-i isə tikilməkdədir. Həmin bəndlər çay sularının gölə axmasına mane olur və bu şəkildə göldə quruma prosesi sürətlənir. Ekspertlər Urmu gölündə yaranan böhranı ən çox bölgədə tikilən su bəndləri ilə əlaqələndirir.
N.S
