Avropa Birliyinin ali nümayəndəsi və nüvə danışıqlarında baş müzakirəçi Enrike Mora güney azərbaycanlı alim Əhmədrza Cəlaliyə dəstək verib və İran hökumətini alimin edam hökmünü ləğv etməyə çağırıb.
O, mayın 13-də özünün tvetter hesabında paylaşım edərək İran-İsveç vətəndaşı olan Cəlalinin edamına qarşı olduğunu və onun azadlığa buraxılmasını istəyib.
Qeyd edək ki, Enrike Mora mayın 10-da nüvə danışıqlarının davam etdirilməsinə mane olan şərtləri müzakirə etmək üçün Tehrana səfər etmişdi.
Əhmədrza Cəlali əslən güney azərbaycanlıdır və 2016-cı ildə İsveçdən İrana elmi konfransa səfər etdiyi zaman həbs olunub.
Tehran İnqilab Məhkəməsi 2017-ci ilin sentyabr ayında Cəlalini “İsrailə casusluq” ittihamı ilə edama məhkum edib. Qərar daha sonra İran Ali Məhkəməsi tərəfindən də təsdiq olunub.
Mayın 4-də İran mediası edama məhkum olunan və hazırda Evin zindanında saxlanılan Əhmədrza Cəlalinin yaxın günlərdə edam ediləcəyini yazıb.
Timur
