دموکراتییا، گوجو گئنللشدیره‌رک، توپلومون اراده و گوجونو یانسیتماقدادیر و نه قدر نسبی مساله اولسادا بیر سیرا اساس قوشول‌لارا(شرط) صاحیب‌دیر.

 

بو قوشول‌لارین بیر سیراسینی بئله آچیقلاماق اولار؛

گوج قوروموندا اولان نماینده‌لرین میللت طرفیندن سئچیلمه‌سی، سئچیم‌لرین شفاف، ساغلام و آزاد شکیلده کئچیریلمه‌سی، حاکیمییتین یانیتجی اولماسی(پاسخگو)، یاسا حاکیمییتی، آزینلیق‌لارین(اقلیت) حاقلا‌ری‌نین رعایت اولماسی، سؤز و دوشونجه آزادلیغی، باسین و مئدییا آزادلیغی(مطبوعات و رسانه)، توپلانما آزادلیغی، پارتییا آزادلیغی، یارقی قووه‌سینین(قضاییه) باغیمسیزلیغی و توپلومون سیاسی، مدنی حاقلاری‌نین رعایت اولونماسی...

 

بوگونکو دونیادا استبدادی سیستم‌لر بیله حاکیمییت‌لرینین دموکراتیک اولماسی و مشروع‌ اولدوقلارینی گؤسترمک اوچون قیسیتلی(محدود) و کنترل ائدیلمیش سئچگی‌لری اویقولاماقدادیرلار.

 

ایران دؤولتی ده یارادیلان گوندن بری یوز ایلدن چوخدور گؤستریسل(نمایشی) سئچگی‌لر کئچیرمکده‌دیر. آنجاق گوج قورولوشوندا هئچ بیر دَییشیم یارانمامیش‌دیر.

 

بو باغلی قورولوش غیرفارس میللت‌لر و ائتنیک‌لر، قادین‌لار، مذهبی گروپ‌لار و ایشچی‌لرین حقوق‌لارینی تاپدالاماقلا یالنیز حاکیم داییره‌نین چیخارلاری دوغرولتوسوندا حرکت ائتمکده‌دیر. ایستر آنایاسانین نقصان و چاتیشمازلیق‌لاری و ایسترسه‌ده دموکراتییا قوشول‌لارینین رعایت اولونماماسی زامان-زامان سیاسی قاتیلیمدا بحران‌لارین یارانماسینا ندن اولموش‌دور.

 

بوگونکو حاکیمییت‌ده بو بحرانلارلا اوز-اوزه‌دیر.

بیر یاندان سئچگی ایله سئچیلمه‌ین گوج قوروم‌لارینین اساس اختیاراتا مالیک اولماسی، بیر یاندان ایسه سئچیلن‌ قوروم‌لارین قورویوجو شورا(شورای نگهبان) فیلتریندن سووشماسی، گوج داییره‌سینین باغلی و دَییشمز اولدوغونا ندن اولموش‌دور.

 

داها دوغروسو بو تور گوج داییره‌سینه یالنیز اؤز آدام‌لاری داخیل اولا بیلیر او اوزدن ده توپلوم اوزمانلاری و الیت‌لرینی یؤنه‌تیم(مدیریت) و حاکیمییت اداره‌چیلیییندن اوزاقلاشدیریلیرلار.

 

بئله اولان وضعیتده ایسه حاکیمییت یؤنه‌تیم مساله‌سینده سورون‌لارلا اوزلشمکده و ایشله‌ییش(کارکرد) باخیمدان پیس دوروما دوشوب مختلف ساحه‌لرده گئریله‌‌ییر.

 

بو یانلیش و غیرعلمی سیاست‌لر اساسیندا اقتصادی وضعیت داهادا پیسله‌شیر و توپلوم ناراضیلیغین اورانینی داهادا یوکسلمکده‌دیر.

 

او اوزدن ده اؤلکه‌نین هر بیر یئرینده آرا-سیرا اعتراض‌لارا شاهید اولوروق.

 

گوجونو و منفعت‌لرینی هئچ بیر کسیم ایله پایلاشماق ایسته‌مه‌ین حاکیمییت ایسه مساله‌نین چؤزومونو بیراز فرقلی گؤسترمه‌یه چالیشدیغی سئچگی‌ده آراییر.

 

حاکیمییت اوندان اؤته هر بیر میدان و حوزه‌لری گوج تطبیق ائده‌رک آرادان گؤتوروب و قانلی اعتراض‌لاردا بؤیوین طلب و ایستک‌لری کنترل ائتمک اوچون بوتون فعالیت‌لری یالنیز اؤز جیزدیغی میدانین ایچینه چکمک نییتینده‌دیر.

 

بو آلدادیجی اویونو بیرسیرالاری سیاسی فرصت کیمی دَیرلندیریب اوردادا رول اویناماق ایسته‌ییرلر.

 

آنجاق اونوتمامالی‌ییق هر بیر میدانین اؤز سؤیلم(گفتمان)، قورال(قاعده) و چرچیوه‌سی واردیر.

 

سیاست دونیاسیندا مساله‌لر دوزگون تحلیل ائدیلمه‌‌یینجه و یاراری اولمایان هر بیر اویون و میداندا بولونونجا ایستک‌لر،آماج‌لار و ماهییت‌لر بیله دَییشر.

 

حاکیمییت بو میدان ایله سیویل توپلومون طلب و ایستک‌لرینی اؤز ایچینده آلاراق اونلاری قیسیتلاییب و سوییه‌سینی ائندیره‌رک، توپلومون ناراضیلیق‌لاریندان قالخان گوجو او داییره‌لرده خرجله‌‌مک نییتینده‌دیر.

 

اونا گؤره ده منجه سیویل توپلوم بوتون گوجویله حاکیمییت میدانیندا حضور تاپمامالی‌دیر و اساس گوجونو او میدان‌لاردان اوزاق داییره‌لرده ساخلامالی‌دیر.

 

یالنیز بئله اولان دورومدا توپلومون چیخارلاری قورونور و ایستک‌لرین سوییه‌سی ائنمه‌ییر.

 

سیامک میرزایی

 

گوناز تی وی 

E.Y