میللی حرکتده میللی دوشونجه چرچیوه‌سی تامامیله اورتایا قویماق امکانی اولماسادا بیر سیرا ایلکه‌لر، اینانج‌لار و بعضا آماج‌لارین یازیلمامیش فورماسی‌ایله بیر چوخلاری تانیش اولموش‌لار.

بو یازیدا قیسا اولاراق تطبیق ائدیلن اساس دؤرت تاکتیکانی نظردن کئچیره‌رک مساله‌نین ماهییتینی آچیقلاماغا گیریشه‌جه‌ییک.

۱. موجود سیستم مستویسینده حرکت ائتمک

بیر چوخ فعال‌لار ایران حاکیمییتینین جیزدیغی سیاسی، اجتماعی و کولتورل داییره‌لر ایچینده فعالیت ائتمک و او اورتاملاردان یارارلانماق ایسته‌‌میش‌لر. مثلا سئچکی‌لره قاتیلماق

   بو آلان‌لاردا چالیشان فعال‌لار دولتین باسقین قووه‌لری ایله سورتوشمه‌مک اوچون میللی ایستک‌لرین سوییه‌سینی ائندیرمک مجبورییتینده قالیرلار و گؤرونن اودور کی سیاسی اجتماعی آلان‌لاردا دئییل یالنیز بعضی زامان‌لار، کولتورل اورتاملاردا ایره‌لی گئدیب بعضی زامانلاردا ایسه گئری چکیلمک مجبورییتینده اولموش‌لار. نییه‌کی مرکزی دولتین سیاست‌لری او اورتاملاری دارالدیب، گئنیشلندیرن اساس ائتکن‌دیر.

۰۲ ایران اپوزیسیون مستویسینده حرکت ائتمک

بیر سیرا فعال‌لار میللی ماراق‌لارین دوغرولماسینی ایران اپوزیسیون‌لارین کسیم‌لرینه قاتیلماق ایله اؤنه سورمکده‌دیرلر.

آنجاق عنعنوی اولاراق ایرانین اساس اپوزیسیون‌لارینین سؤیلم‌لرینده فارس ناسیونالیزمی و راسیزم دوشونجه‌سی داهادا قاباریق شکیلده گؤرونمکده‌دیر و بو ایسه میللی حرکاتین ماهییتینه قارشی و ضد اولان بیر مساله‌دیر. او اوزدن ده او مستویده حرکت ائدن‌لر هئچ بیر میللی سونوجا وارماییرلار.

۳. تورکیه-آذربایجان مستویسینده حرکت ائتمک

بیر سیرا فعال‌لار میللی مساله‌نی تورکیه و آذربایجان دولت‌لرین چرچیوه‌سینده تانیملاییب، اؤنه سورمکده‌دیرلر.

دوغال اولاراق بوگونکو دونیادا هر بیر دولت اؤز سورون و چیخارلاری اوغروندا حرکت ائتمکده و اساس مساله‌نی اؤلکه‌لرینین چرچیوه‌سینده گؤرمکده‌دیرلر.

او اوزدن ده قونشو دولت‌لر ایله سورون چیخماسین دئیه اونلارین ایچ مساله‌لرینه مداخله ائتمکدن چکینیرلر. آنجاق وورغولامالی‌یام بو دوروم مختلف وضعیت‌لره گؤره مثلا ساواش، دئوریم و یا مرکزی دولتین ضعیفله‌مه‌سی ایله دَییشیب فرقله‌نه بیلر.

۴۰ تام باغیمسیز مستویده حرکت ائتمک

بیر سیرا فعال‌لار میللی حرکاتی، یالنیز آذربایجان چرچیوه‌سینده تانیملایاراق ایران پوزیسیون و اوپوزیسیونوندان و خارجی دولت‌لردن باغیمسیز اولاراق دوشونمکده‌دیرلر.

بو فعال‌لارین فیکرینجه هئچ بیر کسیم و یا قووه میللی مساله‌نین ماهییتینی اونلار قدر دوشونه بیلمز. 

میللی مساله‌نین ساغالماسی، میللی فعال‌لارین ساغا-سولا آخمادان، ایستک‌لری اکسیلتمه‌دن، میللی آماج اوغروندا کؤنوللو چالیشماق و میللی اراده‌نین اورتایا قویولماسی ایله گرچکله‌شر. بئله اولدوقدا میللی گوجون سرگیلنمه‌سیله بیر سیرا قووه‌لرین دسته‌یی بیله قازانیلار.

آنجاق بوتون وورغولادیغیم تاکتیکالار و فعالیت‌لره رغما هله‌لیک میللی مجادله‌ده ایسته‌نیلن سونوج‌لار الده ائدیلمه‌میش‌دیر. نییه کی ایران پوزیسیون و اپوزیسیونو میللی مساله‌ده سس بیر اولاراق بیزه قارشی بیرگه فعالیت گؤسترمکده‌دیرلر و بوتون سیاسی، اجتماعی، کولتورل، اقتصادی، هنری و ایدمان ساحه‌لرینده ایران ناسیونالیزمی و فارس راسیزمی گئنیش شکیلده سرگیلنمکده‌دیر اوسته‌گل میللی فعال‌لار ایسه مختلف انگل و سورون‌لار ایله اوز-اوزه دیرلر.

اقتصادی دورومون پیسلشمه‌سی، یئنی نسیلین شخصی ماراق‌لاری اوغروندا چالیشماسی، توپلومون یاتای‌لاشماسی، کوتله‌نین دوشونجه و سیاست‌ دونیاسینا اولان ماراق‌لارینین آزالماسی، فارسلاشما سوره‌جینین چوخالماسی، میللی فعال‌لارین دیدیشمه‌سی و ..

سونوندا وورغولامالییام هر بیر اجتماعی-سیاسی حرکتده بیر سیرا اساس فاکتورلار واردیرلار؛

ایله‌‌تیشیم(ارتباط)، مالی قایناق‌لار، مئدیا، اولوشوم‌لار، دوشونجه‌ و سؤیلم، توپلوم کسیم‌لرینین تانیش‌لیغی و قاتیلیمی و گرچک‌لره دایانان استراتژی و فعالیت‌لر‌دیرلر.

بون فاکتورلار حرکتین گوج یئرلری دیرلر. قارشی دشمن و مخالف‌لرین چایالارینا رغما او فاکتورلار ساغالدیقدا دوغرو تاکتیکالار ایله آماجا وارماق اولاجاق البت.

سیامک میرزایی

گوناز تی وی

E. Y