روایت(آنلاتی) حادثه و تجربه‌لرین آچیقلاماسینا دئییلیر. هر بیر روایت هانسیسا حقیقتی، مشروعیتی، و اساسلاندیرمانی( توجیهی) اورتایا قویوب، بیر آماج یا مقصد داشیماقدادیر.

بوگونکو دونیادا اولان سیاسی-اجتماعی روایت‌لر، گئنل اولاراق ایدولوگییالار و منفعت‌لری ساغلاماق اوچون دئییلمکده‌دیرلر. 

متاروایت‌لر(روایت کلان) ایسه سیاسی، تاریخی و اجتماعی مساله‌لری گئنل بیر چرچیوه‌ده آچیقلاییب و هانسیسا ایدئانی(ایده) یانسیداراق، اؤزلرینی مطلق حقیقت سانماقدادیرلار.

پست مدرن دؤنمده ایسه مطلق اولان هر شئی و متاروایت‌لره سون وئریلیر و بالاجا، یئرل روایت‌لر همده نسبی‌لیک‌لر اورتایا چیخیرلار. 

ایندی ایسه بیر سیرا متاروایت‌لردن اؤرنک گتیریرم.

 ارمنی و یهودی سویقیریم روایت‌لری

نه قدر حقیقتی عکس ائتدیردییینه، نه اؤلچوده اولوب اولماماسینا و نئجه‌لییینه بیله باخمایاراق، بو متاروایت‌لر بوتون اینسانلاری او میللتلره قارشی حساس ائدیب، اورکلرینی آجیتمیش‌دیر او اوزدن اخلاقی و اینسانی باخیمدان اونلارا دستک وئرمک، تاریخی و کوتله‌سل اوزونتولرینی و چکدیکلری ظلم‌لری جبران ائتمک و او اجتماعی و تاریخی حادثه‌‌لرین و جنایت‌لرین تکرار اولماغینین قارشیسینی آلماق اوچون، داها دوغروسو بؤیوک مصلحت اوچون اونلارا هرتورلو دستک وئریلمکده‌دیر. همده بونو تاریخین عدالتی و یا اینسانلیغین بورجو اولاراق آلقیلاییرلار. 

بو اخلاقی و انسانی دستک و بؤیوک مصلحت ایچینده ایسه، او میللت‌لرین ائتدییی سوی‌قیریم و جنایت‌لر بیله گؤزآردی ائدیلمکده‌دیر. 

بعضاده ایندیکی زاماندا قارشیلیق وئرمه‌یی بیله مشروع حاق کیمی تانییان‌لاردا اولور! 

او اوزدن ده خوجالی و غزه سویقیریم و کوتله‌سل جنایت‌لر، دونیا گؤزونده گؤرونمه‌مکده‌دیرلر. 

یعنی خوجالی و غزه داها اؤنجه‌کی قبول ائدیلمیش متاروایت‌لرین قوربانینا چئوریلیرلر. 

ایندی ایسه مساله‌نی باشقا بیر یئره داشیماق ایسته‌ییرم.

فارس ائتنیگینین متاروایتی؛

 بو متاروایتده‌ قوتساللاشدیریلمیش بیر ایران متنه دؤنوشور. او ایرانا باش‌اَیمک و اونا تاپینماق بیر اخلاقی، دینی و اینسانی گؤره‌و اولاراق آلقیلانماقدادیر. مدنیت مرکزی تانیتدیریلان و ایدئال بیر ائنتیک کیمی اورتا قویدورولان ایران و فارس مساله‌سی، دینی، تاریخی، حافظه و دوشونسل(فکری) ساحه‌لرده حاکم کسیلمکده‌دیر.

قارشیسیندا اولان و یا اونا باش‌قالدیران هر بیر روایت و دوشونجه‌نین حؤکمونو ایسه خیانت، اینسانلیق سوچو و غیراخلاقی بیر مساله کیمی تانیتماقدادیرلار.

بو روایت اسطوره، دین و تاریخی حادثه‌لر اجزاسیندان اولوشوماقدادیر.

 مثال اوچون هخامنش‌لرین اَن ایدئال حکومتلری، کوروشون اینسان حاقلارینی یانسیدان گیل یازیسی، دونیا هنر و مدنیتین مرکزی اولان فارس مدنیتی، دونیانین ان گؤزل و شیرین دیلی اولان فارس دیلی و ساییرا

بو روایتین اساس مقصد و آماجی تانیملادیقلاری جغرافیادا فارس ائتنییینین حاکم اولوب باشقا ائتنیک و میللت‌لره مسلط اولماسی‌دیر.

بو روایت ائییتیم(آموزش)، مئدیا، سیاست، اوردو و دیل قوروم‌لاری ایله دئییلیب و استحصال اولور. 

ایندیکی دونیادا متاروایت یوخ‌اولماقدا و یئرل روایت اورتایا چیخماقدادیرلار. 

اونا گؤره هر بیر سیاسی، اجتماعی مساله‌‌لرده مختلف روایت‌لره شاهد اولماقداییق. 

کولتورل ساواشلارین اساسیندا بیله روایت‌لر دایانماقدادیر.

او اوزدن روایتی اولمایان هر بیر سیاسی اجتماعی آخیم، ساواش میدانینا گیرمه‌دن اودوزموش، یئنیلمیش آخیم‌دیر دئمک. 

آنجاق اونوتمایالیم گرچه‌یی و حقیقتی یانسیدان روایت، اَن قالارغی و عدالتلی روایت‌دیر.

 

سیامک میرزایی

 

گوناز تی وی

E. Y