ؤزگورلوک آدی ایله

سارسیلماز و آییق میللی فعاللار

بو چاغدا ایران آدلانان اؤلکه ده گئدن سیاسی- اجتماعی اولایلارین نئجه باشلادیغی، نئجه داوام ائتمه سی و هارالارا وارا بیله جگینی بیر چوخ آچیدان تحلیل و آنالیز ائتمک اولار، آنجاق هر ندن اؤنملی، ایندی کی دورومدا گئدیشاتی ایزله ییب و وار گوجوموزله ائتگیمیزدن قیراغا چیخماسینا ایزین وئرمه یه رک، بو جدی پروسئسی مدیریت ائتمکله بو چاغدا و بو آشامادا ان اؤنملی گؤره ویمیزی یئرینه یئتیرمه لییک.

بو اؤنم، بو گون هر بیر میللی فعالین بوینونا دوشن ان حساس گؤره و ساییلیر.

دیرلی میللتچیلر؛ بیلدیینیز کیمی بیر سیرا اوپوزسیون آدلانان سیاسی جریانلار کی، تاسوفله ذات و ماهیتلرینده اولان آنتی تورک دوشونجه لرین، حتی بو دورومدا بئله گیزله ده بیلمیرلر، چالیشیرلار بو سیاسی جغرافیادا ایللرجه یانلیش و شوونیستی سیاستلرین نتیجه سینده یارانان اقتصادی فلاکتی ابزار ائده رک، ایللر بویو فارس راسیزمینین مختلف ساحه لرده آیری سئچگیلیکله، غیر فارس میللتلره ائتدیگی ظولملری بو سون اولایلارلا اؤرت باسدیر ائدیب، سانکی بوتون ایران میللتلرینه بیر سوییه ده ظولم اولورموش کیمی گؤستریب و مختلف رسانه لرین گوجو ایله آذربایجان میللتین، اؤزلری نین یئنی آریاچیلیق پروژه لرینه ابزار ائتسینلر، و بو گئدیش ایچینده آذربایجان تورک میللتینین مشروع و حاقلی اولان میللی ایستکلرین بو مشکوک دالغانین ایچینده ایتیرمک اونلارین آماجی دیر.

قوشقوسوز کی بئله اولمایاجاق!

نییه کی ایللر بویو میللی حرکتین اؤز بسترینده بئجرتدیگی، آییق و ایش بیلن‌ اوغول - قیزلاری عرصه ده اولاراق، دیقتلی داورانیشلاری ایله بوتون توطئه لری خنثی ائده جکلر.

آنجاق بو دورومدا میللی فعال اولاراق ان اؤنملی گؤره ولریمیزدن بیری بودور: وورغولایاراق سؤیله ییرم؛ بونونلاکی هله! هئچ بیر آکسیانین چاغیرانی و باشلایانی دئییلیک، آنجاق بیر سیرا رسانه لرین تبلیغی نتیجه سینده و هابئله فارس شوونیزمی نین آذربایجان تورک میللت ینه تحمیل ائتدیگی اقتصادی تبعیضلر اوزوندن، اؤلکه وی آذربایجاندا، احتمالی باش توتا بیله جک تظاهراتلاری یاخیندان ایزله ییب و همیشه کی کیمی میللتیمیزله چیین-چیینه وئریب، هر قیمته اولورسا اولسون آکسیانین و شعارلارین ماهیتین، میللی ایستکلر دوغرولتوسوندا ایرلی گئتمه سینی ساغلاییب و قورومالی ییق.

دیقتلی اولمالییق حاکیم شوونیزم له، بوگون قارشی قارشییا دوران اوپوزسیون، بو مرحله ده آذربایجان دا بو آکسیالارین باش توتدورماسی ایله نئچه هدف داشیماقدادیر، او جومله دن؛ مرکزده گئدن شعارلاری و ادبیاتی آذربایجان شهرلری نین اعتراضلارینا جالاییب و آذربایجان تورک میللت یندن، باشقا بیر گؤرونتو دونیا سوییه سینده سرگی یه قویماق ایسته ییرلر.بو اوزدن بوتون میللی فعاللار وار گوجلری ایله اونلارین یاراتدیغی دالغالاری مدیریت ائده رک اؤز علیه لرینه و میللتیمیزین یارارینا چئویرمه لی دیرلر.

البته بوگونکو توتوموموز هر لحظه ده ییشیله بیلر و میللی حرکت بیر یومروق اولاراق سرعتله عکس العمل دن عمله کئچه بیلر.

عباس لیسانی -10/10/1396