گوناز تی‌ وی: آزربایجانین میللی-مدنی فعالی «موسی سودی» پانفارسلارین تورک انتشاراتلارینا ائتدیکلری سایغی سیزلیغی آچیق مکتوبلا تبریز دوستاغیندان قیناییب.

«موسی سودی» تبریز مرکزی زینداندا و یازدیقی مکتوبدا، آزربایجان میللتینین بیر اولادی اولاراق، پانفارس لارین غیر فرهنگی و غیر اینسانی ایشلرین شیددتله محکوم ائدیب.

آزربایجانین میللی فعالی، راسیستی و شوونیستی فارس سیستمی و قوندارما تاریخ ینه ایشاره ادیب کی فارس اولمایان میللتلری، تحقیر آلتیندا ساخلاییبلار.

«اولو تانرینین آدی ایله؛

راسیستی و شوونیستی فارس سیستمی ۱۳۰۴-ینجی ایلینده قورلان زاماندان بو چاغادک ایللر بویو یالان و قوندارما تاریخ لرینده، غیر فارس میللتلره غالیب اولما و تورک میللتین آسیمیله ائتمه آماجی ایله فارس اولمایان میللتلری تحقیر آلتیندا ساخلاییبلار٬ بو آرادا رسانه لر٬ روزنامه لر و... یاردیمیلا فارس میللتینی اوستون گوسترمکله، آنتی تورک و آنتی عرب پروسه سین داوام ائتدیریب لر.

تاسوفله آذربایجانین غنی تاریخی و ادبیاتینی گوسترگه سی اولان سندلرین آرادان آپارماق و بایکوت ائتمک ایچین اللریندن گلنی اسیرگه مه ییبلر. بو آرادا آذربایجان تورک گنج لری گونو گونده ن علم، تکنولوژی٬ ورزش٬ ادبیات و... ساحه لرینده گلیشمه سی و ایفتیخار یاراتماقلارینا شماتت ائدیب لر.

خاطیرلاتمالیام ۲۱ آذر ۱۳۲۵ فاجعه سینده میللتیمیزین بیر چوخ قهرمان اوغول-قیزلارین سوی قیریم ائده ندن سونرا جینایت لرینه دور دئمه دن آذرین ۲۶-ینجی گونو آذربایجان فرهنگینی، دوشونجه و وارلیقلارینا تهلوکه سایاراق بوتون آذربایجان تورکجه سینده اولان کیتاب، مکاتبه و سند لری یاندیب لار...

ایسلام دوروندن بویانا مین ایل تورک حکومت لری و مفاخیر لری ایش اوستونده اولوب و اونلارین حاکمیتده اولدوغو زامان هئچ بیر اقلیتده اولان میللت تحقیر اولونماییب و بو بیزیم غنی فرهنگیمزی گوسترگه سیدیر.

ایللر بویو ستارخانلار٬ باقرخان لار و خیابانی لر ایرانین تمامیت ارضی سین قورویوبلار و بویوک جوغرافیامیزدا اولان غنی معادین و ثروت لریمیز ایراندان یاشایان بوتون میللتلرین گلیشمه سی یولوندا استفاده اولونوبدور. آنجاق بونلارا رغمن تحقیر پروسه سی دایاندیریلماییب.

ایسلام اینقیلاب اولایلاریندا آذربایجان تورک اولوسونا برابرلیک و میللتلرین قارداشلیق وعده سیله یارانان فضادا آذربایجان میللتی یئنه اینسانی وظیفه سین یئرینه یئتیریب، حق و باطل نبردینه گئتمکده تورک میللتی اونده اولاراق مین لر جه شهید، جانباز، مفقودالاثر و آزاده بو توپراغا تقدیم ائله ییب و اجانیب لری سینیرلاردان چیخاردیب ایفتیخارلار یارادیبلار.

ایندیسه بو گونلر تهران سرگیسینده بیر عده پان فارس، نژادپرست و کلمه نین حقیقی معنی سینده لومپنلری ساپورت ائده نلر، آذربایجانین فرهنگی، اینسانی و قانونی ایستک لرینین سرگیله مه سی گوزلرینده تیکان گوروب، آذر تورک غرفه سینه گیریب قاریشیقلیق سالیبلار.

ایللربویو میندار ایشلری بو قونونو یئنیده ن بوتون اینسانلارا خاطیرلادیر کی هر زامان آذربایجان تورک میللتی اوز تاریخ و فرهنگ و گوجونه اینانسا، پانفارس لارین یالانلاری و بیزیم وارلیقلاریمیزا صاحیب چیخانلارین چیرکین اوزلری اوزه چیخاجاق و بواولایلار بونلارین سونودو ...

من بیر میللی-مدنی فعال و آذربایجان میللتینین بیر اولادی اولاراق اوز نوبمده پانفارس لارین غیر فرهنگی و غیر اینسانی ایشلرین شیددتله قیناییب بو ایشلرینه دور دئیرم.

"موسی سودی"

24 اردیبهشت 1397

تبریز مرکزی زیندانی»

گوناز تی‌ وی

R.F