بو سحر هر سحرده اولدوغو کیمی، گونومو جیب تلفونوملا خبرلری ایزلئمکله باشلادیم. بیر آزربایجان میللی فعالی و تخصصیم گئرگی، چالئشارام موافیق و موخالیف رسانه لری(مئدیالاری) و اونلارین سوسیال مئدیالارینی اوخویام. بوگون تلگرامدا ایران دوولتینه باغلی اولان ‘’آذری ها’’ کانالینادا باخدیم. داها اونجه بو کانالئن سایتیندا شخصیم و بیر چوخ میللی فعالین علیهینه مطلبلر یایئنلانیبدیر. آنجاق بو دفعه مسئله فرقلی ایدی. گوناز تلویزیونونون صاحیبی، احمد اوبالی بئیین 40 ایل بوندان اونجه ایران (گونئی آزربایجان)’ دان نئجه چیخیش ائتدییی و خصوصی حیاتینا داییر بعضی سندلر یاینلاییبدیر. بو سندلره نورمال اینسانلارین الی چاتامییاجاغی اوچون بو ایشین آرخاسیندا ایستیخبارلتی سیستم و یا سیستم لرین اولئوغو کسین دیر.

احمد بی اوبالی نی شخصی فعالیتری خاریجینده، ایداره ائتدییی تلویزیون واسیطه سی ایله هاردایسا آزربایجان میللی حرکتینه منسوب اولان هر کس طرفیندن تانییر. ساده جه آزربایجان میللی حرکتی یوخ بلکی ایران دوولتی و اونو مرکزیتچی سیستمینه جیددی بیر موخالیفی اولدوغودا معلوموموزدور. او دا هر سیاسی اکتیویست کیمی سیاسی حیاتیندا اوغورلاری و اوغورسوزلوقلاری اولوبدور. دوغرو و یانلیش بیلدیکلریمیز آدئملاری اولوبدور. دوغرولاری اوچون دستکلییب، آلقیشلامیشیق و سهولری اوچون تنقید توپونا توتموشوق. منجه ده اله اولمالیدیر. آنجاق اونودمایاق فعالیتی اولمایین اینسانین یانلئشی و دوغروسو اولماز!.

1995جی ایلدن اوزومو آزربایجان میللی حرکتی ایچینده گورموشم. هر کس بیلیر او ایل گاموح باشقانی سایین ماحموعلی(چاغری) بی چهره گانی، تبریز شهریندن مجلیس سئچیملرینه قاتیلمیشدی و بیزلرده ایلک رایی میزی(سسی میزی) میللی حیس لریمیزدن دولایی اونا ورمیشدیک(16 یاشئم واردی). گرچی فاشیست سیستم، چهره گانی بی مجلیسه گیرمسینه مانع اولدولار و اللریندن گئلنی زامانئندا ائتدیلر. آچیقجاسی بو یازئدا بو مسئله یه دئینمک ایستمیرم. دئمک ایستدییم بودور کی او ایلدن بو گونه هاردایسا 24 ایلدیر گئچیر و من شخصیم اولاراق او یولدان دونمه میشم و هدفه چاتانا قدر دونمیه جه ییمیه آند ایچمیشم. چونکو نهایی هدفیم و آرزوم، وطنیمیز و میللتیمیزین آزاد گورمکدیر.

10 ایلدن چوخدور کی تورکییه ده یم و گونوموزه دئک ایرانا گوره بو اولکه ده کی دموکراتیک سیستم دن دولایی اوزومو گلیشدیرمه یه(دونیا گوروشو و علمی اولاراق) چالئشمیشام. آزربایجان میللی حرکتی و تورک میلتیمیزه قاتقیمین اولماسینی ایسته میشم و الیمدن گلنی حقوقی و قانونلار چئرچیوسینده ائتمیشم و ائده جه یم. هر اینسان دا اولدوغو کیمی دوغرو و یانلیشلاریم اولوبدور.

24 ایللک دوشونجه مدن سونرا، ایندی قایئدیرام بو آذریها تلگرام کانالئنئن احمد بی اوبالی حاقدا یاینلادیغی چیرکین معلوماتلار، شانتاژلار و تهدید لره. منه قالئرسا بوردا اساس هدف احمد بی یی وورماقلا، گوناز تلویزیونودور. چونکو بو تلویزیونون اونملی تاثیری، فرقلی فرقلی زامانلاردا ثبوت اولوبدور. 1385 اینجی ایلین (ایران قئزته سی) حادیثه لری، قاراداغ زلزله سی، اورمو گولونون قورودولماسینا قارشی اولان میللی اعتیراضلار و سون زامانلاردا رحمتلیک زهرا نوید پور حاقدا اولان آچئقلامالار و وریلیشلر. البته بونلار بیر نئچه اورنکدی!.

البته کی آزربایجان میللی حرکتینین هم ایچریده و هم خاریجده بیربیریندن دَگرلی میللی فعاللاری و آیدینلاری واردیر و هر بیرینین دَگری باشقادیر. بو چوخ چتین و او درجه ده اهمیتلی میللی موجادیلمیزین شرطلرینه باخارساق (گونئی آزربایجانین دونیا خریطه سینده چوخ استراتژیک یئرده یئر آلدیغی اوچون) حلم ایشیمیز چوخدور. بلکه ده یولون اولیندَییک. بلکی ده بو خمیر چوخ سو آپاراجاق.

خصوصی اییله سون ایکی ایلده ایستر ایرانین ایچیندن و ایستر خاریجیندن گوناز تلویزیونو و اونون رهبرلییی و عائله سینه چوخلو سالدیریلار اولوبدور. منجه بو سالدیریلارین شبهه سیز اساس مقصدی گونئی آزربایجان تورک میللتی و میللی حرکتدیر. چونکو الیمیزده بوگونه دک ساده جه بو تلویزیون واردیر. میثال اوچون اگر بو تلویزیون اولماسایدی شبهه سیز زهرا نویدپورون سسی بو قدر دونیایا چاتمایاجاقدی. البته خاطیرلاتماق ایسترم کی گوناز تلویزیونو، سندلر اساسئندا زهرا نویدپور اولومویله باغلی، مستقیم انقیلاب کئشیکچیلرینی (سپاه پاسداران) مسئول گوسترمسی ایران دوولتینین غضبینی اوز اوستونه چئکمیش اولموش اولابیلر. آنجاق هر زامان حاققی سویلئمک و اونون یانئندا دورماق قدر چتین اما شرفلی بیر ایش اولماییبدیر.

منیم بو یازئدان یگانه هدفیم سایین اوبالی بی یی مودافیعه ائتمک دییل و بلکی ده اونون بئله مسئله یه احتیاجی یوخدور، آنجاق میللی حرکتمیزه قارشی چوخ بویوک اویونلار گئدیر و او اویونلارا قارشی حاضیرلیقلی اولمالییق. یوخسا هاممئمیز بو گئمی ایله بیرلیکده باتاجاییق. گرچی قارشی طرفین گمینین ایچینده آداملاری اولا بیلر و اونلاردان دا دیقتلی اولمالییق.

کریم اصغری – 25 دی 1397 (15.01.2019)