«دوستاق-شهر» - سیامک میرزایی

آخرین خبرها

«دوستاق-شهر» - سیامک میرزایی

۱۴۰۰.۰۷.۲۸, ۰۷:۳۶

Gunaz.tv

سورگون یاشامی غریبه بیر یاشام دیر. نه دوستاق کیمی دوستاق دیر، نه ده اؤزگورلوک کیمی اؤزگورلوک. اصلینده هم دوستاقلیغی همده اؤزگورلویو ایچینده قاپسایان بیر یاشام تورودور.

آنجاق گونلر کئچدیکجه، زامان اؤتدوکجه مجبوریت لر آغیرلیغی سنی اؤزگورلوکدن داهادا اوزاقلاشدیریر و اورتام بیراز بویوک دوستاق یاشامینا

بنزه مه یه باشلاییر. سورگون اینسان، دوستاق سینیرلامالار و امکان سیزلیق لاردان قورتارمیش کیمی گؤرونسه ده اصلینده او باشقا بیر دوستاقدا یانی شهرده دوستاق ائدیلن بیریسی دیر.

دوستاقدا دووارلار اونو سینیرلاشدیریرسا، سورگونلوکده اونو بیر شهر سینیرلاشدیریر، دوستاغین یاخین دووارلاری و قیسا چئوره سی، سورگونلوکده داهادا اوزاقلاشیر و بویویور، داها دوغروسو گؤزه گؤرونمز بیر سینیرلاما و مجبوریت ایچینده یاشاییر یانی شهر-دوستاق بیر یاشام.

سورگون بیر شهر ایچینده اؤزگوردور آنجاق عین حالدا همن شهرده دوستاق دیر و هرگون شهرده تانیدیلان بیر پلیس مرکزینده وار اولدوغونو، قاچمادیغینی بیلدیرمک اوچون بارماغینی مرکبه باتیریب سورگون لر دفترینده تانیش بارماق ایزلری آلتیندا بیر بارماق ایزینی داهادا آرتیریر.

تورپاغینا، سویونا و هاواسینا یاد اولدوغون، آلیشا بیلمه دییین شهر-دوستاق گئت-گئده اوز گؤزونده یانسیماغا باشلاییر. آنجاق هر بیر ثانیه یادلیق لارین بؤلگه سینده کئچن زامان آخیشیندا، دوغمالیق لار و یورت باغلیلیغی داهادا ایچینی، اوره یینی و روحونو بورومه یه باشلاییر.

اؤزگه لر شهری، سورگون اینسانی، لاپ اوزاقلاردان تانی ییر و اورالی اولمادیغینی دویور و هئچ دانیشماغا، سوز دئمه یه باشلامادان هارالی اولدوغونو سانا بیلیر.

بئله ایسه سورگونلوکدن آماج، اینسانی اولدوغو توپلومدان، یاشادیغی یئردن و یورتدان آیریب، قیریب اوزاقلاشدیرماقدان و هله ده گوج گؤزه تیم آلتیندا ساخلاماقدان عبارت ایمیش. گوج، گؤوده و ذهن لری

گؤزه تیم آلتیندا ساخلایاراق اونلاری ایسته دییی یؤنه و چرچیوه یه سالماق ایسته ییر.

مستبد قورولوش لار، اینسانلارین باشقالاریلا، اؤزلری له بیله ایلیشگی قورماسینا انگل اولورلار، یئنی اینسان یاراتماق اوچون هامینی باش اَین و دوشونمه دن

اویان لار ییغینینا و بیر سؤزله ایسته دیکلری بیچیمه سالماغی اویقولاماغا چالیشیرلار، آتومیلشدیریلن توپلوم، آیری- آیری یاشاماغا و ذره لشمه یه دؤنوشدورولور. بیرئیله شن کوتله آراسیندا ایلیشگی، توپلاشما و اؤرگوتلشمه دن سؤز گئده بیلمز.

بئله لیکله بیزی دوستاغا سالماغین و سورگونه گؤندرمه یین ندنی آیدینلاشیر: بیلمک، دوشونمک، ایلگی لنمک، یورت، میللت و اینسانلاری سئومک،گوج لره باش قالدیرماق، اؤزگورلویه جان آتماق ، عدالت آختارماق و هر زامان حقیقت یانقیسی اولماق. او زامان بو اینسانسال آرمان لارا و آماجلارا گؤره هر بیر چتینلیگه، آجی یا، دوستاغا، سورگونه قاتلاشماغا و اؤلومه بیله سینه گرمه یه، ده یر.

سیامک میرزایی - قایین شهری

گوناز تی وی

SH.A

GUNAZ.TV

آخرین خبرها