اولو تانری‌نین آدی ایله: بویوک آذربایجان تورک میللتی و دَیه‌رلی میللی فعاللار / عباس لیسانی

آخرین خبرها

اولو تانری‌نین آدی ایله: بویوک آذربایجان تورک میللتی و دَیه‌رلی میللی فعاللار / عباس لیسانی

۱۴۰۳.۰۲.۲۱, ۱۲:۰۲

بیلدیینیز کیمی گونئی آذربایجانین میللی حرکتی‌نین گئدیش سوره‌جینده بیر چوخ مانع‌لر و داش آتمالارین؛ ایللر بویودور حاکمیت وریندن آردی کسیلمیر، او جومله دن: چالیشیر میللی حرکتی قارما-قاریشیق، بولانیق و داغینیق گوستره‌رک کوتله‌نی اوزللیکله گنج نسلی بو حرکتدن اومودسوز ائدیب و بو اوُلوسون اوزگورلوگه گئدن یولون باشاریسیزلیغا اوغراتسین.

Gunaz.tv

بو آرادا ایللردیر، حاکمیت‌دن آسیلی اولمایان و میللی حرکته اوره‌یی یانان بعضی دیه‌رلی یولداشلاریمیزدا ( بو حرکت گرک آرینا و دورولا- حرکت ده هر آچی دان شفافیت گرکدیر، دوشونجه سی ایله) بیلمه‌دن بو یانلیش بورلوغانین ایچینه دوشورلر.

کئچن اوتوز نئچه ایل‌ده اوزللیکله سون اون ایلین ایچینده، سانال دونیا گئنیشلندییی دونم‌ده بیزه هر تورلو سالدیری‌لار اولوبدور؛ ائله‌کی، هئچ بیر تهمت، افترا، یالان باغلاماق، قارا یاخما، توهین، تحقیر‌، تحریک و ... آماجی ائتمکدن اسیرگه‌نیلمه‌ییب دیر.

بونلارلا بئله هامی‌نین گوزو اونونده اولدوغوکیمی، دیلیمیزی دیشیمیزله سیخیب و سوسموشوق! سوسموشوق کی، داشلار میللی حرکتیمیزه دئییل، بیزه دَیسین؛

آنجاق بوتون بو قورویوب و قورنماقلارلا بئله، بیزیمله بیر خاص قونو و گئنل میللی توتوملاردا ایش بیرلیگی ائدیب و بیرگه گورونن چوخ سایقی‌دیه‌ر بعضی یولداشلار، دوغال اولاراق بیر چوخ قونودا باغیمسیز داورانماقدادیرلار و اوزل سلیقه‌لری و توتوملاری اولدوغونا گوره حتی بیزیم دونه‌لرجه تنقید و لاپ بئله دیلکلریمیزی گورمزدن گلیب و اوز بیلدیکلرینه دوام‌ ائدیبلر و ائدیرلر.

آنجاق بیلدیرمه‌لی‌یم، میللی مسئله ده حتی ایلکه‌لریمیزه قارشی گورونن شخص و حتی قوروملارین اوزل یاشاملاری و شخصی آبیرلاری و حیثیت‌لری،بیزه هر زامان قیرمیزی جیزیق اولوب و اولاجاق و بو دوغرولتودا ان یاخین یولداشلاریمدا اولسا؛ بللی یا بلیرسیز قونولارا دایاناراق اینسانلارین اونورو ایله اوینایان هر بیر ائیلمی قینامیشام، قیناییرام‌ و قینایاجایام.

گئنل اورتامدا میللی حرکتین سایکولوژیک دورومو، و حتی اثبات اولموش اولسا بئله اینسانلارین اوزل یاشامین هر آماجلا اولموش اولسا، سرگی‌یه قویوب و تارتیشما قونوسو ائتمه‌یی هر کیم‌دن و هر کیمه قارشی اولورسا اولسون قیناییرام و آچیقجا بیلدیریرم: حرکتی قارما-قاریشیقلیغا و آنارشیزمه ساری آپاران هر تورلو حاشیه‌دن اوزاق دورماق هر بیر دوزگون میللتچی‌نین میللی گوره‌وی دیر.

سون سوزو اولاراق وورغولامالی‌یام؛

بوتون دوستلار و یولداشلاردان گوزلنتیم بودور؛ منی مندن ائشیدسینلر و بو اساسدا قضاوت ائتسینلر( یازیلاریمدان و دانیشیقلاریمدان). حتی منیمله ان یاخین گورونن یولداشلارین و شخص‌لرین هئچ بیر کَسمَتی توتومو و سوزو دوغرو و یا یانلیش، هر تورلو قونودا بیزی باغلاماز.

اینسانلار اوزگوردورلر و گوروشلرینده و توتوملاریندا آزاد دیرلار.

عباس لیسانی

۱۴۰۳/۲/۲۰

گوناز تی وی

E.Y