باشقالارینین نظر و رضایت‌لرینی اؤنمسه‌مه‌یرک، اونلارین قاتیلیملارینی ساغلامایاراق، تک‌باشینا اؤز کئیفینه و اؤزخوشونا قرار وئریب، ایش گؤرمک و اؤزباشینالیق ائتمه‌یه استبداد دئییلیر.

 

سیاسی آنلامدا ایسه بیر فرد یا گروپون، یاسا، حقوق و توپلوم اینسانلارینین رضایت‌لرینی نظرده آلمادان، تام اؤزباشینا بیر شکیلده، باسقی و زور واسیطه‌سیله سلطه یاراتماغا استبدادی حکومت دئییلیر.

 

بئله بیر سیستم‌لرده اینسانلارین حاق و اؤزگورلوکلری تانینماییر و حکومتین گوج داییره‌لری سینیرسیز شکیلده هر اورتاما اوزانماقدادیر.

 

بعضی دوشونورلره گؤره استبدادین اولوشماسیندا، استبدادی حکومتلر، بعضی‌لرینه گؤره ایسه مستبد فردلر و یا استبدادی توپلومون رولو دقته آلینمیش‌دیر. 

 

آنجاق گؤرونن اودورکی بو مساله‌ده، هم دولت همده توپلوم، استبدادی اورتام‌لارین سوردورولمه‌سینده اؤنملی رول اویناییرلار.

 

 اؤنجه توپلومدا اولان بعضی فردی و اخلاقی اؤزللیکلرین، استبداد ایله اولان ایلیشگیسینی آچیقلاییرام

 

۰۱ من مرکزلی دوشونجه و داورانیش:

توپلومون هر بیر اورتامیندا حاکم اولان بو احوال-روحیه، باشقالارینین نظر و قرارلارینا اؤنم وئرمه‌ییر و هر بیر ایشده یالنیز اؤز باخیش و قرارینی نظرده توتوبدا، اؤزونو ان اؤنملی، باجاریقلی و اوستون فرد بیلمکده‌دیر.

اؤزونو به‌یه‌نن بو فردلر باشقا اینسانلاردان یالنیز اونای، تایید و آلقیش ایسته‌ییرلر و هئچ بیر تنقید ویا باشقا دوشونجه‌لره دؤزه بیلمیرلر.

۰۲ باشقالارینین حاقلارینی تانیماماق

یالنیز اؤزونو اؤنمسه‌ییب، به‌یه‌نیب و اؤز مرکزلی باخیش ایله دونیایا باخان فرد، باشقالارینین حاقلارینی تانیماییر، نظر و باخیش‌لارینا اؤنم وئرمیر.

 او هر مساله‌ده یالنیز و یالنیز اؤزونو گؤرور و اؤز باخیشینی دا حقیقت سانیر.

۰۳ قوتساللاشدیرماق

هر بیر مساله قوتساللاشدیقدا اونون چرچیوه‌سی دوشونمک و سورغولاماق و تنقیده قاپانیر. او اوزدن ده چوخ زامانلار حقیقت، قوتسال دوشونجه‌لرین قوربانینا چئوریلیر. 

 

۰۴ مرید-مرادی ایلیشگی

بو تور ایلیشگیلرده مریدلرین وارلیغی، مراد شخصیتینین هژمونیا و هاله‌سینده، اَریییب یوخ‌اولورلار. اونلار اؤزلرینی مرادین وارلیغیندا تانیملایاراق یالنیز مرادی گؤرمکده‌دیرلر. 

مراد مطلق حقیقت و قوتسال بیر وارلیق اولاراق عقیده و دوشونجه مکتبینین ذیروه‌سینه چیخاریلیر.

او اوزدن ده مریدلر دوشونمک و یارادیجیلیق قابلیت‌لرینی ایتیریرلر. اونلار اوچون مراد هر شئی دئمک‌دیر و مراددان باشقا سؤیلم و باخیش یانلیش‌دیر.

 

استبدادین سیاسی بویوت‌لارینی؛

هر بیر استبدادی حکومت، باسقی، قورخوتما و جزالاندیما واسیطه‌لری ایله توپلومو کنترل و اداره ائتمکده‌دیر. 

بئله بیر سیستمی اداره ائدن‌لر توپلومون حقوق، رضایت و اؤزگورلوکلرینی تانیمایاراق، یاسالارا دئییل یالنیز اؤز کئیفلری اساسیندا قرار وئریب داورانیرلار. 

او اوزدن ده بئله سیستم‌لرده اینسانلارین اراده، یارادیجیلیق و یئته‌نک‌لرینین یوخ اولوب چیچکلنمه‌ییرلر. 

استبدادین قورخو دونیاسیندا یاشایان توپلوم اینسانلاریندا ایسه، یالان دانیشماق، یالتاقلیق، ایکی‌اوزلولوک، قارایاخماق، یامان-یوووز دئمک، آشاغیلاماق، اینانماماق و ساییرا اؤزللیکلره شاهد اولوروق.

باخیشینی سؤیله‌مک و بیلدییی ایشینی گؤره بیلمک حاققی اولمایان اینسان توپلولوغو ذهن، یئته‌نک و باجاریقدان محروم اولدوغو اوچون سوییه‌سی ائنیر و گلیشمه‌سی دوراقساییر. 

اوزون ایللر بویونجا استبدادی حکومت‌لر چرچیوه‌سینده یاشایان اینسانلار هر نه قدر حکومت داییره‌لریندن قورخسالاردا، بیر-بیرلرینه گلینجه ان قدار شکیلده داورانماقدادیرلار. 

هئچ بیر مساله‌ده بیلگی و باجاریغی اولمادان هر مساله‌یه دایاز، بایاغی و مطلق یانیت وئرن و اؤزونو مطلق حاق سانان فردلر استبدادین محصول‌لاری‌دیرلار.

 

سونوج؛

ایستر سیاسی ایسترسه‌ده توپلوم اورتاملاریندا عؤمور سورن استبداد، اینسانلارین ذهن‌لرینه هوپوب و بوتون وارلیق‌لارینی قاپساماقدادیر. 

یعنی هر بیر اورتامدا استبداد ایله اوزلشیرسک، بوتون اورتاملاری قاپساییب‌دیر دئمک‌دیر

عاییله، دوستلوق گروپ‌لاری، درنک‌لر، بازار صینیف‌لری و سیاسی آخیم‌لاردا بیله استبداد یئنیدن اوره‌تیلیر(بازتولید).

چاغداش،تاریخ دیلیمینده آرا-سیرا شکیلده استبدادی قورولوشو سؤکه‌جک حرکت‌لره شاهد اولساقدا، او اورتامین یئنیدن حاکم اولماسینادا شاهید اولماقداییق.

اونون اوچون ده دموکراتییا، حاق و اؤزگورلوک‌ قاورام‌لاری کوتله اوچون اؤنم داشیماماقدادیر. 

داها دوغروسو اینسانلار اؤز-اؤزلوکلرینده بالاجا دیکتاتورلاردیرلار.

 

گوناز تی وی

E. Y