سایقیلی قلم انجومني نين عوضولري و سوروملولاري

نه یازیق کی  چوخلو اومودلار و آرزولارلا ياراتديغيميز، قلم انجومني­نين سيرالاريني ترك ائتمك قراريمي بیلدیرمک ایسته ییرم. بو آجيناجاقلي قراره من بير گونده گلمه­ميشم. من اوولدن  بو انجومن­ين، بوتون گونئي آذربايجانلي قلم صاحيبلري­نين وطن ديشيندا ياشايانلاري اوچون بير دموكراتيك، آچيق و صينفي-سياسي قوروم كيمي فورمالاشماسي اومودیله­  بو انجومنه قوشولدوم ،  نه یازیق کی انجومن­ين رهبرلي­يينده هئچ بير عوضوه جاوابده اولمايان مركزين عمله گلمه­سي، بو انجومني، بير قاپالي، غيري دموكراتيك وسياسي ايدئولوژيك محفيل حالينا گتیریب چیخارتمیشدیر

انجومني بير محفيله چئوريمكده اولان بو مركز، بير اورتا عصيرلره منسوب اولان فئودال ايقتيداريلا، ايسته­دي­ييني ائديب، عوضولرين نئچه­سي­نين استعفاسينا و اوولدن انجومنه ماراخلی اولانلارین انجومن­دن ايلگي­لريني قيرماسينا لاقيد قاليب، عوضولوكلرينه دوام ائدنلرين حتي سوآل­لارينی جاوابلانديرماق ايسته­مير. خوشلارينا گلمه­ين سوآل­لاري قورولتايا حواله ائديب، و قورولتايدا بو سوآل­لارين آلتيندان قاچماق اوچون، اينديدن هم مسلكلريني انجومنه دولدورور. بير سٶزله، اينقيلابدان سونرا تهراندا دوقتور هيئت و دوستلاري­نين قوردوغو "انجومن آذربايجان" كيمي، بير ايدئولوژي­نين ايشغالينا گتيرمك آددیم آددیم و دوشونولموش شكيلده قاباغا گئدير. بيرطرفدن غيري دموكراتيك داورانيش، اساسنامه­ني پوزماق، انجومني ايدئولوژي وورغونلاريلا اٶز "حق" اولمالارينا بير قارانت تشكيل ائتمك و بیر طرفدنده بوتون بونلار حاقيندا بير سس اوجالديغي يا بير سوآل وئريلدي­يي حالدا، فئودال ايقتيدارينه بنزر بير نخوت­ايله، جاواب وئرمكدن آچيق آيدين ايمتيناع ائتمك. بو مركزين باخيميندا "عوضو" بير رعيت­دير، سوآل وئرمه­سي­نين قاباغيني آلا بيلمه­سه ده، جاواب وئرمك، قيامته (قورولتايا) حواله اولونور. انجومنه حاكيم اولموش بو مركزین، يالنيز مجازي فضادا بير ايكي ايش گٶرموش اولسادا، پرده آرخاسيندا اصلينده فاجيعه حئساب اولمالي اولان، بير سيرا مضحكه­يه بنزر ايشلریده  آز اولماميشلار. بو مركز اٶز مسلكداشلاريني انجومنه داخيل ائمك عملياتي­ني سپتامبر آييندا باشلادي. ايك كانديدين عوضولويو 2012  دوققوز سپتامبر تاريخينده كئچيريلن ايجلاسدا تارتيشيلدي. بو شخصين انجومنه عوضو اولماسيني موناسيب حئساب ائتمه­ين بير عوضو، دبيرلر هئتينه بو ايشه باخمادان اٶنجه بو "ايلك كانديد" حاقدا اولان سندلرله تانيش اولماني تكليف ائتدي. چوخ ايلگينج بير رفتار كيمي، بو مركز بئله بير سندلرله حتي تانيش اولماغي لازيم گٶرمه­دي!

 

آيلار اٶتدوكجه،  اٶز مسلكداشلاريندان اولمايان عوضولرين سوآل­لاري جاوابسيز قالدي، بير محفيل كيمي ييغيشيب پالتاكدا تكراري سٶزلر دانيشماغا چوخ هوسلي اولسالاردا، اونلارا تنقيدي ياناشماسيني ظن ائتديكلري مئديا   طرفيندن مصاحيبه دعوتيني جاوابسيز قويدولار و سون زامانلار منيم ده يازيلي  ایسته ییمه بئله جاواب وئرمه­دیلر. چوخ تاماشالي­دير كي بو مركزدن سوروشدوغو سوآلينا، آيلارلا جاواب آلا بيلمه­ين انجومن عوضوي، چوخ قيصا بير زاماندا ياشاديغي اٶلكه­نين ناظيرلر كابينتيندن، اٶلكه رهبري­نين سفري حاقدا معلومات آلماقدا هئج بير چتينليك اولمادان موفق اولموشدور!

 

ديرلي دوستلار!

ايشاره ائتدي­ييم انجمونده ايكي گئدیشات  بیرلیکده دوام ائتمه ده دیر

1.     بير طرفدن انجومنين ايلك يارانماسيندا اونا اومود بسله­ينلرين بير چوخو يا يازيلي استعفا وئریرلر يا عملده انجمنله موناسيبتلريني قيرماقلا، بو قورومدان اوزاقلاشيرلار. بونلاردان 11 نفري­نين آدلاري منه معلومدور و سيزلر يقين كي، دوكتور هادي بی خسروشاهي، دوكتور محمد رضا  بی هيئت، علي رضا  بی جوانبخت و ناصر بی مرقاتي­نين استعفاسيندان خبريز واردير.

2.     يوخاريداكي گئدیشاتلا  موازي اولاراق، انجومنه، ميللي حركاتلا دوشمنليكده "آد" قازانميش معيین ايدئولوژي منسوبلاري دوشونولموش بير پلان اساسيندا جذب اولورلار. بو شخصلرين سايينا آرخايين اولان "مركز"، هر منتقد سسين صاحيبني، ايندي­دن قورولتايدا ميدانا چيخماغا حواله وئرير.

 

 

مسئله­نين باشقا فاجيعه­لي يٶنلري چوخ اولسادا، دئییلنلرین هر بيري بو غيري ساغلام، غيري دموكراتيك، جاوابده اولمايان سياسي ايدئولوژيك محفلي ترك ائتمه­يه یئتری قدر آغير بير سبب­دير.

سون سٶز اولاراق  دئمه لییم کی ، بيز قلم انجومني قوراركن، بو انجومني باغيلي محفيله چئويرمك چابالارینا  تانیش ايديق. او زامان،  بو انجومني بير ايدئولوژيك تشكيلاتي محفيل حالينده اله آلماغا آچيق-آيدين پلانلار واريدي. او زامان بو پلانلارين قاباغيندا دورانلار، انجومن­ين ايداره­سيندن كناردا قالمالاريلا، همان پلانلار ايندي بير آز گئجيشسه­ده حياته كئچير.

چوخ آرزولالا ياراتديغيميز انجومن­ين سيرالرايني ترك ائتمك آجيناجاقلي اولسادا، يارانميش دورومدا ، یالنیز  ساغلام آدديم كيمي گٶرونور.

قوروجولار هیئتینین عوضوو

دبیرلر هیئتینین  عوضوو

 اسماعیل جمیلی         

28 دسامبر 2012

كاليفرنيا