آلمانيانين هايدئلبئرگ شهرينده اولو بابکين دوغوم گونو و اورمو گٶلونون قوروماق فاجيعه­سي موناسيبتيله اولان توپلانتيندا نه‌لر باش وئردي؟

اٶرت باسدير اولموش بعضي فاكتلار 

بيلديگينيز کيمي 6، 7 و 8  ايون تاريخيند، آلمانييانين هايدئلبئرگ شهرينده قهرمان بابکين دوغوم گونونو آنما و اورمو گٶلونون دورومو ايله ايلگيلي فئستيوال کئچيريلمه­سي اعلام اولموشدو. بو توپلانتي اوچون اؤنجه‌دن چاغريش وئريلميشدي کي، بوتون خاريجده­کي آزربايجانلي فعاللار و تشکيلاتلار، سياسي دوشونجه‌لريندن آسيلي اولماياراق بير يئره توپلاشيب بابک خورمدينين آزربايجان تاريخينده وئرديگي موباريزه حاقدا و اورمو گٶلونون قورودولماسيلا باغلي اولايلاري موباحيثه ائتسينلر و ان اساي بو مسئله­ايله آلمان توپلومون تانيش ائتسينلر.

بو چاغيريش بير سيرا آزربايجان سيته-لري طرفيندن و گوناز تي وي و فارس ميلتينه عاييد اولان "ايران گلوبال" آدلي سيته-ده يايينلانميش و تبليغ اولونموشدو. تکجه ايران گلوبال سيته‌سينده اولان بيلديريشده بير بويوک فرق گؤزه چارپيردي. اودا بوندان عيبارتدير کي اورموگٶلو ايران بايراغينا بورونولموش حالدا اولان بير رسمله تبليغ ائديلميشدي. بو ندنله بير سيرا داخيلده و خاريجده کي فعاللار بير بيريله علاقه يه کئچميش و ايران گلوبال سيته­سينده کي بو چاغريشين فورماتينا اولان، اؤز اعتيراضلاريني، فئستيوالين تشکيلات کوميته‌سينه بيلديرمک قرارينا گليرلر. اعتيراضلار نتيجه‌سينده کوميته، ايران گلوبال سيته­سينده باش وئرن بو حاديثه دن خبردار اولوب و اونون اوردان قالديريلماسيني ايسته‌ميش. نتيجه‌ده ايران گلوبال او فورم تبليغاتي سيته‌سيندن قالديرماق زوروندا قالميش. البته بو تبليغاتين ايران گلوبال دان سيلينمه­سي چوخ گئج باش وئردي. (باخين بيرينجي شكيله) آوروپانين چوخلو اؤلکه‌لرينده (هوللاندييا، اينگيلتر، ايسوئچ، آلمان، نوروئژ و ... ) البته هامي­نين پرده آرخاسيندا نه باش وئرمه­سيندن خبري اولمادان، بو فئستيوالدان يازيلي بير شكيلده حيمايت ائتميشديلر. 7 ايون  2012 تاريخينده توپلانتي چوخ آز ايشتيراکچي ايله ايشينه باشلادي.

سالونون اؤن صحنه­سي اورموگٶلونه عاييد اولان بويوک پلاکاردلاريله بزنميشدير. سالونون بير طرفيننده، بير ايكي آزربايجانلي فعال طرفيندن، بير نئچه ماسا اوزرينده کيتاب، درگي­لر، قزئتلر و شکيللر سرگيلنميشدير. بو سرگيده گونئيده چاپ اولان نويد آزربايجان قزئتي و وارليق ژوورناللاري، اويرنجي سيته­سينين آيليق نشرييه‌سي سرگيلنميشدير.

سرگينين بير آز قيسمتينده قوزئي آزربايجانا عاييد اولان کارت پوستاللار نوماييشه قويولموشدور.

بو آرادا، آزربايجانين دونيا شؤهرتلي صنعتکاري راميز قولييئو­ين صحنه­يه گلمه‌سيني ايشتيراکچيلار سئوينج و هيجان ايچينده گؤزله‌ييركن، خوشا گلمه‌ين اولايلار باش وئردي. بئله‌کي، فئستيوالا قاتيلان بير سؤيداش، 3 مئتره‌ليک آزربايجان بايراغي­نين صحنه­ده يئرلشمه­سيني ريجا ائتدي. بو ايسته­يه قارشي، فستيوال كوميته­سي­نين عوضولريندن بيري "صحنه­ده آزربايجان يا هئچ بير بايراق آسيلمياجاقدير" دئدي او سؤيداشيميزدا بو فيکيرله راضيلاشدي.

آما قونو بونونلا بيتمدي. زالين ديشيندا باشقا بير سويداشيميز چوخ سايقيسيزجاسينا زالين خاريجينده يئرلشن يئمک سالونونون بوجاقيندا ماسا اوزرنده اولان آزربايجان بايراغي­نين دا قالديريلماسيني باشقا سؤيداشيميزدان ايسته‌دي. او سويداش، بايراغين ندن قالديرماسيني سوردو؟

جاواب بئله اولدو:

- سنه بايراغي قالدير دئييرم بورادا آزربايجان بايراقي اولماز، اؤنجه‌دن بو سؤزلر دانيشيلميش. - سيز حاقلي­سينيز، آما بو بايراق اولدوقجا کيچيک و صحنه­دن ده اوزاقدير، بونون نه مانعي واردير کي؟

-"سنه دئييرم مانعي چوخدو و بورادا بايراق اولماز!"  

او سؤيداشميز گرگينليک يارانماسين دئيه، حتّي او کيچيک بايراغي دا ماسا اوزريندن گؤتوردو.

مراسيم ده ايشتيراك ائتميش باشقا بير شخص، بو صحنه­‌لري ايزله‌ديکده چوخ تأسسوفلنيب و کيچيک بايراغي آليب کيتاب سرگيسي اولان يئرده يئرلشديردي و دئدي:

-بو سرگييه من باخيرام و کيمسه بو کيچيک بايراغين بووردا يئرلشمسينه مانع يارادا بيلمز !!!

بيرحالداكي بو كيچيك بايراق بوردا ايدي، برلين دن گلن بير شخص، محمد امين رسول­زاده نين شكليي، اوز قابيغيندا اولان، "اٶيرنجي" درگي­سي­نين بير نسخه­سيني ماسانين اوستوندن آليب، اونون  بوردا سرگي­لنمك حاقي اولماديغيني سٶيله­­دي. حبيب بي بايجان قاباخجا  تذكر وئرميشدي كي، سرگي اوچون كيتابلار سئچمكده "ديقتلي اولمالي­سيز"! گرگينليك­لر دوام ائديردي. قوزئي­لي گنجلرين بيريسي بو صحنه­لري گٶرركن، دئدي:

-من بونلاري گٶرنده، لاپ لنين زاماني­نين جينايتكار بولشويكلري ياديما دوشور، بونلار كينم ديرلر يا الهي!

بونلار ايران گلوبال سايتيندا اورمو گٶلونون عكسي ايران بايراغينا بوروندورمه­يه اعتيراض ائتمه­ميشديلر. اژدر بهنام ايران گلوبالدا باشچيلاردان اولدوغو حالدا بو ايشي گٶرمه­ميشدي و بو ايشي باشقالاري گٶرمه­لي اولدولار و يازديغيم كيمي، اورمو گٶلونو، ايران بايراغينيدان آزاد ائتمك فعاليتلري ايكي گون چكدي. آمما بو مراسيمده همن آداملار آزربايجان بايراغينا هم اعتيراض ائتديلر و هم بو حاقدا اينترنتده فارس ديلينده چيركين آنتي آزربايجان تبليغات آپارديلار.  عجبا بو اٶزلريني دموكرات آدلانديرانلار، ايران ميللتلري­نين قانلارينا بويانمويش ايران بايراغيني اورومو گٶلونه ياپيشدرماقدا بير قباحت گٶرمه­ديكلري حاقدا، ال بويدا آزربايجان بايراغيني نئجه "دٶزولمز" و "يول وئريلمز" سانديلار؟

قوزئي­لي گنجلر بو اورك بولانديريجي صحنه­لردن سونرا ييغيشيب سالونو ترك ائتديلر. بير نئچه نفر اونلاردان مراسيمي ترك ائتمه­مه­يي خواهيش ائتديلر. اونلار چوخ يالوار ياخاردان سونرا قالماغا ريضايت وئرديلر. و سونرا اونلاردان "شيرزاد اسد" آدلي گنج شاعير راميز قولي­يئف طرفيندن صحنه­يه دعوت اولوب، آلماس ايلديريم­دان بير نئچه شعر اوخودو كي راميز قولي­يئف اٶز تاريلا داهادا زنگينلشديردي. بو شعر اوخوماق، آتموسفري بير چوخ درجه­ده تميزله­دي و اٶنجه باش وئرميش آجيناجاقلي صحنه­لرين زهريني آلدي. بوردا شيرزاد اسد آزربايجان هيمني­نين سسلنديردي و اونولا برابر اٶزوده هيمين­ين سٶزلريني اوخودو. هامي اياغا قالخسادا، بير نفر آجيق و حتي نيفرتله سالونو ترك ائتدي و بير نئچه نفر يئرندن دورماديلار. 8  ايون 2012،  آلمان توپلومونو، اورمو گٶلو فاجيعه­سيله تانيش ائتمك اوچون، علمي سئمينار کئچيريلمه­لي ايدي. بو سئميناري ائکولوژي موتخصصي ه.آشيلمن و ياشيل­لار پارتياسيندان خانيم كلاوديا روتون مشاوري علي محجوبي 2سي بيرليکده آپارديرلار. آشيلمن دونيادا قورويان گوللر هاقدا گئنيش ايضاحات وئريلدي، آما اورموگٶلو حاقدا كونكرت بيلگيسي اولماديغي اوچون، بو حاقدا چوخ آز دانيشدي. سئمينارين سونوندا موتخصصلر ايشتيراکلچيلارين سواللاريني جاوابلانديرديلار و اوست اوسته چوخ وئرميلي  آليندي. سئمينار آزربايجان تورکجه‌سي و آلمان ديلينده کئچيريلدي. بو فستيوال اصلينده اومور گٶلو فاجيعه­سين آلمان توپلومونا تانيتماق اوچون قورولسادا، مراسيمين بو مسئله­يه حصر اولموش حيصه­سينده يالنيز ايكي اوچ نفر آلمانلي قاتيلميشدي.

مراسيم­ين ان اوغورلو حيصه­سي يقين كي اوستاد پروفسور راميز قولي­يئف­ين و اونونلا برابر قوزئي­لي پيانيست خانيم، گولچين آصلانووا و داها بير قوزئيلي موسيقي قوروپو ايدي. 300 نفرليك سالوندا 45 نفرين اوتورماسي بيزيم اوچون اوزوجو بير وضعيت يارادميشدي. آما قوزئي­لي موسيقي او ستادلاري نه ايشين بو حقير جنبه­سينه باخديلار و نه آزربايجانين رسمي بايراغينا اولان سايغي­سيزليقلارا. اونلار، بٶيوك صميميت و تواضع­كارليقلا يوكسك سويه­لي موسيقي اثر­لري ايفا ائتديلر.

بو مقامدا راميز قولي­يف­ و باشقا قوزئيلي صنعتكارلارين ايفا ائتديكلري آزربايجان  موسيقي سي­نين سئحري هاميني بيرلشديردي: آزربايجان بايراغينا ياد اولانلار دا، آلماس ايلديريم­ين شعرين اوخويان قوزئيلي گنج شاعير ده، سماورا باشيندا دوران آلمانيايا يئني گلميش و "آزربايجانلي"نين آزربايجان بايراغينا حٶرمتسيزليك ائتمه­سيني، عٶمرونده  ايلك دفعه گٶرمه­سيندن شوكا دوشموش قوزئيلي گنج اوغلان دا، هامي بو موسيقي­له بيرلشديلر.

مراسيمده بير-بيرليله اويقون رفتار ائدن 4 نفرين حضورونا ايشاره ائتمك لازيمدير: سيروس مددي، احد واحدي، محمد آزادگر  و اژدر بهنمام. بونلار آزربايجان حركاتيندا مخصوص فيكيرلريله تانينيبلار و بعضي عجيبه قريبه نظرلري و عمل­لري اونلاردان باش وئرميشدير. مراسيمن گويا سياستدن و سياسي بويالاردان مستقيل اولاجاغي حاقدا سٶز وئريلسه­ده بو شخصلرين هماهنگ حضورو و رول­لارين گٶرمه­مك اولموردو.

سونوج:  ايندي بو حاديثه­لردن بير نئچه گون كئچير و بو مراسيم حاقدا بير نئچه يازيدا اينترنتتده نشر اولوبدور. من يوخاريدا اشاره ائتدي­ييم و بير پارا  باشقا سٶزلر اساسيندا اينانيرام كه بوتون بو اويونلاردان مقصد، هايدلبئرقده بير بٶيوك غيري سياسي توپلانتي ياراتماق و اوردا آدلاريني چكدي ييم و ميللي حركاتدا اٶز كئچميش سابيقه و عمللرينه گٶره حاشيه­ده قالميش اينسانلاري، ميللي حركاتا سيراماق و اونلاري گونده مه گتيرمك اولموشدور. حبيب بي بو اويونلارا بيلركدن يا بيلمه­دن قاتيلميش و يالنيز ظاهيرده آپاريجي اولموشدور يقين كي، آپاريجي ائله همان نئچه نفر و ايران بايراغيني ايران گلووبال دا  قبول ائديبن، آزربايجان بايراغينا و محمد امين رسول زاده يه قارشي تحقير ائدن شخصلر اولموشدلار.

-پروفسور راميز قولي يئف مراسيمدن سونرا دئدي: من بيلسه­يديم كي بوردا آذربايجان بايراغينا حٶرمتسيزلي­يه شاهيد اولاجاغام، هئچ واخت بورا گلمزديم. ايچينيزه لكه­لي آداملار واردير و ديقتلي اولمالي­سيز.

-يازيلان راپورلاردا، تشكيلات كوميته­سي و تداروكات تيميندن يالنيز حبيب بي يين آدي چكيلميشدير. اصلينده بوتون تداروكات ايشلري هايدئلبرقده گٶرونموشدور و او جومله­دن فرامز قلي زاده و اونون عائيله سي چوخ بٶيوك زحمتلر چكميشديرلر كي، اونلاردان بوردا اٶزل تشكور ائتمه­يي لازيم گٶرورم.

-سونرادان سوء نيتله يازيلميش بير راپوردا، گويا مراسيم­ده "آلله" آديلا بزنميش تي شيرت گينلرين اولماسيني ايدعا ائديبلر. بو اصلينده آزربايجانين رسمي نيشانيندا آزربايجانين اودلار اٶلكه­سي اولماق سمبولي كيمي "آلوو" شكلي­دير و "آلله" سٶزونه هئچ بير دخلي يوخدور. هاميا معلوم دور كي آزربايجان سكورلار بير اٶلكه­دير و اوردا هئچي بير ديني يا ضد ديني دٶولت نيشاني يوخدور.

-منجه بو مراسيم و اوردا باش وئرن اولايلار و كناردان ايران گلوبال كيمي سايتلارين بو ايشه موداخيله­سي حاقدا چئشيدلي قلم صاحيبلري تحليل يازمالي­ديرلار. من بو مختصر راپوردا اوز شاهيد اولدوغوم ماجرالاري يازماقلا، بئله بير ايشه ايمكان يارداماق ايستيرم.

جاواد قازانلي

13 ايون 2012

هايدئلبرگ

D.O